上周五美股三大指數偏軟，市場開始從新關注利淡消息，有別於8月份反彈時，盲目地樂觀，加上火FOMC將議息，大家都保守咗，睇埋議息鮑爺會唔會放多隻鷹再作定奪。至於港股連跌三星期，恒指累計已蒸發1408點，今早再跌逾二百點，創半年低位。
恒指低開66點，其後跌幅擴大至233點，雖未跌至3月低位，但已經相當接近，並創6個月低位。其後跌幅收窄，跌64點，見18697半日高位，可惜A股喺人仔跌穿七算後走軟，恒指半日報收18580，跌180點；國指半日跌79點，報6341；恒科指跌78點，報收3779，盤中跌至逾四個月低位。半日成交額只有512.18億元，成交持續低迷，港股進入陰乾狀態。
藍籌股普遍下跌，美國PCAOB人員今日開始到港審查中概股審計底稿，上周五中概股喺美股嗰邊已跌定先，今日幾隻龍頭科技股全線走軟。阿里(09988)半日跌3.4%，京東(09618)半日跌2%，美團(03690)跟騰訊(00700)半日跌少於1%。都好耐無提到小米(01810)，唔經唔覺，小米已跌近十蚊水平，目前險十皮，半日口跌超過2%。港交所(00388)半日跌近1%，再創52周新低，300元嘅支持位，可能變成阻力位。不過藍籌股又未至於全軍覆沒，中銀香港(02388)、比亞迪(01211)、潤啤(00291)跟神華(01088)逆市上升。
港府有意進一步放寛入境檢疫措施，相關復常概念股逆市上升，國泰(00293)升1.8%；九倉置業(01997)創四個月高，最新升2.5%；周大福(01929)獲摩通將評級直接上調至增持，半日升5.8%。不過唔係阿Man烏鴉口，0+7嘅檢疫措施，相對太多其他國家完全開放邊境已經係唔方便，能唔能夠吸引到旅客訪港真係唔好過份憧憬。
美國針對內地CRO企業，生科股彈一日又捱沽，香港上市生物科技指數半日急跌3.2%。上周大跌逾兩成嘅藥明生物(02269)半日再跌5.1%。雖然有大行指美國針對呢個行業對相關股份只會帶嚟短暫影響，但市場一於少理，先沽而後快。
麥狄文
(徐狄怡‧證監會持牌人)
