上周五美股調整，主要係10年期債息再度逼近3厘，重上2.96%，令科技股沽壓增加，而加密貨幣顯著下跌，亦反映之前嘅risk on情緒有所收歛，市場觀望本周央行年會Jackson Hole，鮑爺會否放鷹。
事實上，市場相信下月聯儲局加息0.75%嘅比例再度增加。上周五美股嘅跌幅，係6月以嚟最大嘅一日，港股一向跟跌唔跟升，美股咁跌法，港股今日當然低開。不過A股近日喺成交支持下，走勢漸入佳景，港股上半場喺A股回升帶動下，收復早段失地，半場倒升收市。
恒指低開200點，最多跌208點，見19564半日低位，又係去到19500水平頂得住，喺A股回升下，港股亦回升，最多升52點，見19825半日高位，但仍受制10日線(19902)。恒指半日升39點，報19812；國指半日升32點，報6752；恒科指半日跌1點，報4190。半日成交額455.54億元，繼續靜過鬼。
喺全球受通脹困擾下，各地央行都要加息以壓制通脹，但內地卻相反需要放水以刺激經濟，內地宣布下調8月LPR(貸款市場報價利率)，一年期LPR利率報3.65厘，較上月下調0.05厘；5年期以上利率報4.3厘，較上月下調0.15厘。人行加大對金融市場支持力度，利好A股氣氛。
恒指服務公司上周五公布季度檢討結果，加入四隻恒指成份股，包括百度(09888)、周大福(01929)、神華(01088)以及翰森製藥(03692)。四股今早都做好，除百度半日升2.5%，其他三股都升超過3%。
不過近兩年，染藍股幾乎無乜邊隻有好結果，宣布染藍當日升完，就十居其九見頂回落，回落幅度更相當驚人，個別股份跌幅更達五成，呢個亦係近年恒指有波幅，冇升幅嘅原因。更加有口痕友話一染藍，價變殘，呢句夠晒到肉，講得精準無錯。
人行減LPR，加上內地有報道指，住建部、人行、財政部等有關部門近日推專項借款，帶動內房股跟物管股做好，雖然碧桂園(02007)上周曾發盈警，但市場早已消化內房股今年業績大倒退，甚至有機會盈轉虧嘅事實，今日減一減LPR，呢兩個板塊亦趁機反彈，大部份內房跟物管股都錄得2%以上升幅。
港股其他板塊都無乜好講，上周北水更錄得淨流出，連任性嘅北水都唾棄港股，港股喺缺乏成交配合下，繼續動彈不得，水唔到，渠不成，港股都只能夠喺幾百點之內窄幅上落，而呢段時間，莫過話無升幅，就連波幅都收窄，搵食艱難。
麥狄文
(徐狄怡‧證監會持牌人)
