美國聯儲局上月會議紀錄反映局方仍堅持緊縮貨幣政策，而目前未有任何數據顯示通脹已受控回落，美國未有條件可以喺明年上半年減息。之前阿Man都講咗，美國市場對重新放水預期過份樂觀，喺通脹高企下，除非美國經濟死得直一直，但以目前就業市場嘅狀況，又未至於要放水谷經濟，炒Fed put未免有啲一廂情願。咁嘅環境下，十年債息重上2.9厘，美股三大指數都回軟，較受息口走勢影響嘅科技股回得多啲，納指跌逾1%。港股呢，就跟美股跌，而唔跟美股升嘅，咁隔晚美股腳軟，港股有乜本事升得到。
恒指高開69點見19991，開市價已經係半日高位，其後掉頭向下，最多跌156點，見19766半日低位，20天線未能收復之際，仲要失埋條10天線(19969)，唔話佢弱底都係自己呃自己。半日恒指跌124點，收報19797；國指則跌43點，報6711；恒科指跌36點，收4202，就算騰訊(00700)績後股價反彈，恒科指一樣升唔起。半日成交額486.88億元，繼續靜過鬼。
藍籌股普遍受壓，話咗美息上升唔等於銀行股強，半日大笨象(00005)跌1.7%，叫做仲守喺50元樓上。友邦(01299)同樣守住75元，但半日都要跌1.1%。港交所(00388)業績麻麻，股價今日再跌1.7%，穿咗340元近日支持位都係濕滯，下個支持位大約喺320元。藍籌股陸續派成績表，藥明生物(02269)中期業績增長38%，股價半日升3%，重上70元水平，但仍受制20天及50天線，講真都唔叻得去邊。吉利(00175)中期業績賺少35%，股價上半場先跌3%。
騰訊噚日收市後公布業績叫做好過預期，股價半日彈3.1%，不過以往高增長日子不再，加上主要股東南非基金大把貨要搵位走人，320元可能又遇阻力。而騰訊講咗暫時未有計劃出售美團(03690)股份，美團股價重上170元暫時企穩，不過暫時唔出售，大方向都係要搵方法減持，可能用返減持京東(09618)嗰一招，以送贈方式贈予股東，一於共同富裕，成果跟股東分享，咁都係減持嘅一種方式，但就唔喺市場沽貨，不過係偷換概念，但對美團嚟講都係好事，至少短期唔使面對龐大沽壓。
碧桂園(02007)發盈警，估計盈利將大幅倒退99%，股價半日跌5.2%，藍籌之中表現最差。其他內房股普遍下跌，其實市場都預咗內房股今年業績瓜多過菜。對於碧桂園盈利大幅倒退，阿Man係咁睇，公司雖然賺少九成九，但都仲未使見紅，唔使蝕錢已偷笑，若然有阿爺擔保發債，捱得過今次內房淘汰賽，碧桂園仍然係內房之中嘅生還者之一。
麥狄文
(徐狄怡‧證監會持牌人)
