美股上周五終結之前升勢，因為SNAP兼績後，股價急挫近四成，扭轉之前樂觀氣氛，納指跌近1.9%，令今日港股呢邊嘅科網股跑輸大市，而港股上周反彈逾300點後，今日喺科指拖累下，半日走勢偏軟。
恒指低開92點，跌幅雖然曾收窄至39點，見20569半日高位，但A股走軟，港股跌勢再加深，半日最多跌202點，見20406半日低位。中午恒指報收20454點，跌154點；國指跌66點，報7039；科指半日跌90點，報4507。半日成交只有480.14億，維持淡靜。
藍籌股乏善可陳，重磅股普遍偏軟，只有友邦(01299)反彈0.6%，大笨象(00005)公司keep住回購，但未對股價帶嚟太大刺激，半日仍要跌0.3%。至於內房股今日逆市反彈，內地據報批准設立2000億至3000億元人民幣房地產基金，為近日充斥住負面消息嘅內房板塊，帶嚟一線希望，內房及物管股半日升勢較為顯著，普遍升幅由超過2%至超過一成不等。雖然有個別專家指內地爛尾樓風波動搖外界對中國經濟信心，甚至預警內地內房爛尾樓事件，或席捲全球且影響國際格局嘅2008年美國次按危機即將重演。
不過阿Man則認為今次內地斷供事件，唔應該跟當年美國次按事件相提並論，主要係中國住房按揭的首期要求比當時的美國嚴謹，而如斷供潮未有擴大到更多未完成樓盤，按目前內地在建樓盤5至9%已爛尾，而且全部有關按揭一律斷供去推算，中國銀行系統嘅住房貸款不良率只會升一個百分點，單憑現時嘅斷供潮並不足以引發系統性風險。
科網股沽壓較大，阿里(09988)半日跌失守紅底，跌2.1%，美團(03690)半日跌3%；騰訊(00700)跟京東(09618)半日則分別跌2.1%及1.1%。其他科網股半日跌幅普遍過2%，但相對整體大市表現，呢期科網股都算過得去。
至於生科股上周見資金追捧，但今日買盤一龜縮唔見人，走勢再之回軟，整個板塊內股份半日跌3%或以上，龍頭藥明生物(02269)半日跌逾半成。不過呢個板塊都係表現反覆，上上落落。
今個星期美股有唔少關鍵消息左右大市，包括周四凌晨美聯儲議息，議息前週二盤後分別有MSFT及GOOG出業績，議息後收市有META，周四盤後有AMZN及AAPL，周五盤前有油股XOM及CVX公布業績，睇睇市場點樣解讀呢批重磅股嘅業績，從而影響到美股表現，港股本身無乜特別消息下，可能都係跟美股上落。
麥狄文
(徐狄怡‧證監會持牌人)
