美滙指數回落，令市場對加息步伐加快預期降溫，美股顯著反彈，市場好似對於美企業績表現平平視若無睹，加上美國基金現金水平偏高，令美股喺美國經濟面臨衰退下，仍然頂得住。港股噚日回吐後，今日跟隨美股造好，今早裂口高開，不過指數僅於窄幅波動。
恒指高開307點，升幅最多擴大至450點，見21098半日高位，重上21000心理關口之餘，一度收復50天線(21034)，其後升幅收窄，喺21000水平爭持，窄幅上落。恒指半日收報21020，升359點；國指升129點，報7226；恒科指升103點，收4610。半日成交只有490.54億元，反映資金唔多肯入場。
藍籌股普遍造好，ATMJ全線向上，阿里(09988)成功守住紅底股身份，半日升4.3%；美團(03690)跟京東(09618)半日升逾3%，騰訊(00700)半日升2.3%。其他重磅藍籌股亦隨大市向上，就連受內房斷供問題困擾嘅內銀股，今日都造返好少少。但係內房跟物管股仍然疲弱，龍湖(00960)半日逆市跌2.2%，成為表現最差藍籌股，其他內房股跟物管股普遍下跌，半日跌幅由0.3%至超過2%不等。
相反近日生科股表現唔錯，板塊內股份陸續發盈喜，資金開始從新關注呢個板塊，龍頭股藥明生物(02269)已發盈喜，股價今日再升4%，更升穿80元短線阻力，如能企穩80元，下一個位有望挑戰85至88元。板塊內其他股份，升幅至少超過3%。
其實呢兩日港股成交縮成咁，都咪話唔恐怖，缸邊友唔願入場，當然係港股表現令人失望。而近日港元持續見資金從銀行體系流走，除咗與美元強勢、美息高企，套息活動增加有關外，另一個原因唔排除有資金流出去買美股。值得留意香港資金最近持續流入美股，單計5月淨買入規模已達88.31億美元(約688.81億港元)，令香港成為美股的最大海外買家。港資喺美股投放增加同時，港股成交則持續萎縮，相信係同兩地股份估值開始拉近有關。
雖然美股表現反覆，但當地唔少重磅科技股，經過一輪調整後，估值已開始變得合理，即使港股呢邊嘅科技股同樣經過一整年調整後，估值亦變得吸引，無奈內地監管陰影揮之不去，當兩地科企估值相若，考慮到政策風險後，亦難怪資金從港股轉投至美股。
麥狄文
(徐狄怡‧證監會持牌人)
