美股隔晚走軟，主要係10年期跟2年期債息倒掛，倒掛深度更加係自2007年以嚟最勁，債息倒掛通常預示經濟或陥入衰退，市場擔心經濟衰退風險加劇，美股反覆受壓。最近美股日升日跌，已令進場資金減少，成交正在縮減，在美股前景未明下，投資者大多卻步。不過中國上半年出口增加13%，港股連跌兩日後，終於有個藉口反彈，但恒指暫時受制於50天線(21043)，未能收復失地。
恒指高開66點，早段升幅曾收窄至29點，見20863半日低位，不過A股回升，帶動港股升幅再擴大，盤中一度升195點，見21040點半日高位，但未能重上50天線，亦未有企穩21000水平。半日恒指收報20974，升130點；國指升30點，報7222；恒科指半日升79點，報4603。半日成交額只有572億元，港股呢邊嘅投資者，同樣審慎，未肯積極入市。
藍籌股個別發展，兩重磅股大笨象(00005)跟友邦(01299)齊齊升1.3%，呢兩日都係靠呢對孖寶支持大市。科網股嘅ATMJ，只有騰訊(00700)逆市跌0.2%，雖然公司連日回購，可惜南非大股東已揚言要喺市場減持，公司再回購亦只能控制住股價唔好跌得太急，但對股價似乎未能起到穩定作用，留意股價一旦跌穿前兩個底部，即325元左右，股價有機會重返3月低位，即300元附近。
阿里(09988)其實亦有一手重量級嘅貨泊咗喺CCASS，市場一度揣測係軟銀隨時要減持，但一直未見動靜，阿里股價喺120元阻力位回落，暫時跟大市上落。至於美團(03690)跟京東(09618)，因為唔似得騰訊跟阿里，有外資持有大量股份，無被外資減持嘅威脅，今日反彈亦好力水啲，半日分別升3.1%及4.6%。
內房物管股呢兩日持續走弱，繼續受債務問題所困擾，今日更有內媒指個別民企內房旗下樓盤已無法獲批貸款，或引致大量爛尾樓盤出現。而碧桂園(02007)雖未見有爛尾樓盤出現，但旗下債券急瀉，令市場擔心其財政面對壓力，股價半日急跌近8%，同系碧服(06098)股價半日逆市跌半成，兩股成為表現最差藍籌。不過阿Man認為碧桂園一系似乎有啲跌過龍，公司自內房債務問題爆煲後，一直未出現過違約，而其現金流亦未見出現問題，債價急跌原因成謎。至於其他內房股亦唔多精神，市場始終對呢個板塊缺乏信心。
麥狄文
(徐狄怡‧證監會持牌人)
