隔晚美股顯著下挫，美國10年期債息急升24點子高見3.39厘，創自2020年以來最大升幅，並處於2011年5月以來的高位；兩年期債息則升30點子，報3.346厘。債息高企令市場憂慮本周聯儲局將加息0.75厘，貨幣政策進一步收緊，聯儲局取向更為鷹派。道指一度跌逾千點，收市跌876點；標指跌151點創今年以來收市新低，並自高位回落逾兩成，陷入「技術性熊市」；至於早已陷入熊市嘅納指，跌530點，跌幅高達4.68%。其實美股早已步入熊市，若然要每一個指數由高位計跌咗兩成先算入熊，咁已經輸死唔少人。
至於港股噚日跌逾700點後，今日一度再跌逾300點後喘穩，但多條移動平均線已失守，上周阿Man已多次強調，恒指逼近22000關，反彈隨時步入尾聲，結果大市不足三個交易日，已回吐逾千點。恒指低開284點，失守21000大關，並跌穿20天線(約20970)及50天線(約20943)，半日最多跌349點，見20717半日低位，其後跌幅收窄。恒指收報20876，跌191點；國指跌80點，報7259；科指半日跌78點，收4520。半日成交701.71億元，嚟到呢個位，上下都難博，缸邊友都唔多想入場。
藍籌股個別發展，美息高企，港息或有機會跟隨上揚，本地銀行股向上，大笨象(00005)升1.1%，中銀香港(02388)半日更升逾3.4%。ATMJ今日回吐幅度算係少，只有阿里(09988)跌4.2%失埋紅底較弱；美團(03690)維持強勢，半日倒升1%；騰訊(00700)半日跌1.5%；京東(09618)跌不足1%，四大巨頭暫時仍然守住支持位。
雖然工信部副部長辛國斌表示，特斯拉已經實現滿負荷生產，但相關概念股仍下挫。比亞迪(01211)挫4.7%，藍籌股中包尾；其他概念股普遍下挫，力勁(00558)盤前見大手上板，每股作價15.25元，上板價較上日折讓12%，批股疑雲下，股價半日跌13.4%。其他Tesla概念股普遍跌3%以上。
虛擬貨幣市場又急挫，BTC總市值更跌穿萬億美元，主要係喺加息周期下，風險資產回報變得唔再吸引，加上美股下跌，令唔少投資者被斬倉，而喺借貸成本上升下，無現金流嘅高風險資產，更加係人人自危，盡量要錢唔要貨，令虛幣市場出現人踩人，鬥快沽貨套現嘅情況。相關概念股今日全線捱沽，不過相對幣市跌幅，今日相關股份跌勢已算係溫和。
值得留意係本周美國除咗有聯儲局議息會議之外，仲會公布PPI以及周五係四重期結算，預期美股呢個星期更為波動，港股本輪反彈浪完結後，亦跟住外圍上落，雖然港股目前受A股影響更大，只要A股撐得住，港股亦唔會直插無水花，但一旦美股繼續插水，港股亦難獨善其身，當大市嚟到21000水平，處於近日上落區間中間位置，走勢更難捉摸，若然未能睇清後市走向，倒不如隔岸觀火，謀定而後動。
麥狄文
(徐狄怡‧證監會持牌人)
