上個星期五(4月1日)雖然係愚人節，不過個市無整蠱我，手執隻上個星期四(3月31日)嘅過夜恒指牛(62982)，一開市就被恒指低開之後拖到差啲死咁滯，老散心態，反正都係囉，就博一博，繼續持貨至目標見小時圖上返10小時線(小時圖10線)或50小時線(小時圖50線)就算啦。最後，恒指整日以低開高走姿態完成一日嘅Trade，喺上個星期五指數喺小時圖，2點至3點嗰粒燭就見到10小時線同50小時線重疊，而嗰住大約係21914點/21916點，而大約喺下晝2點50分左右，指數就正正上破咗呢個兩線重疊嘅位置，就以2點50分on top 加15分鐘走隻(62982)，以當時高低位做過0.051元/0.044元計，平均沽貨價為0.0475元，對比平均買入價0.0585元，作死，第二季第一注就錄得負數23.2%，往後時間要努力啲先得。
今日兒童節，天氣繼續天朗氣清，小朋友都「提早暑假」中，只不過疫情關係，出街玩都可能要揀啲無咁多人嘅地方(當個個都係咁諗嘅時侯，嗰一個地方就會變成好多人架啦)；恒指今日都繼續造好，開市升187點，報22227點。「上個星期隻牛證唔斬咪好囉，可以再輸少幾格嘛！」唔係輸少幾格，係到贏十幾格，不過賣仔莫摸頭，仲要過兩日weekend都真係唔知會有咩事發生，你當我淆底算啦。(隻(62982)有成17.X%街貨，駛唔駛咁多人買呀)
依家9點39分，指數開市後再向上行多幾十點有稍稍橫行嘅情況，睇返恒指牛熊證街貨圖，其實以恒指開市口價，指數已經踩咗入熊證街貨區，第一層22100至22199點仲全數被收回，呢度有相當於366張期指，而22400至22499點，同22500至22599點呢兩層，每層都有過千張期指街貨喺度。依家9點45分，指數雖然高開低走中，不過咁重街貨，又係新一個月，而今個月又有清明、復活節幾日假期，怕且點都會食咗先掛。
睇埋恒指日線圖，上個星期喺日線圖上畫咗個「小圓底」出嚟，仲博指數可以完成呢個「小圓底」去到頸線位(唔係上破，去到都當贏架)，但就係偏偏去唔到，指數向下回落之後仲失10天線，還好上個星期五低開高走之後，條10天線失而復得，今日指數再上，但由之前嘅「小圓底」慢慢變成「三角形」，又係一個待變格局。
既然係咁，就簡單啲用返牛熊證街貨圖去睇就算。以目前小時圖見，指數裂口高開後重上各主要平均線之上，未見有任何天線去比小時圖粒燭借力再向上踩高啲，指數隨時喺高位橫行等天線上嚟比位佢借，或者索性向下去搵天線。咁啦，如果小時圖見指數踩得到天線而守穩再上的話，先至出隻恒指牛(63711)，收回價21528點，同現價有逾500點差距，槓桿都有約44倍唔差架。
聽日係清明紅日，所以今日過夜嘅話，講緊係要過兩晚。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
