熱門:

2021年11月5日 港股直擊 即巿股評

【輪證贏家】日線只有保歷加底線做量度支持

噚日揀咗隻恒指牛(64219),喺朝早11點35分至11點45分見Slow STC(14,3)落到嚴重超賣水平,以當時(64219)高低位做過0.043元/0.039元計,平均買入價為0.041元。

等到下晝3點打後,恒指忽然抽高,仲愈升愈有,迫到Slow STC(14,3)喺嚴重超買範圍行出超買再超買,以3點15分至全日收市前Slow STC(14,3)處嚴重超買水平沽出隻(64219)的話,按當時(64219)高低位做過0.053元/0.046元計,平均沽貨價為0.0495元,對比朝早嘅平均買入價,平均賺幅有20.73%。

話分兩頭,Slow STC(14.3)喺尾市時段搶到咁高,Swing Trade策略上的確可以小注入淡倉博過夜,唔知噚日係咪抽完血個身少咁啲嘢,定還是做咗心電圖個身被電咗一電,再加埋幫個喺電台做嘅舊同事錄音講星期五嘅策略,又睇錯月曆,就係咁好順理成章地以為噚日係星期五,仲喺聊天室蠢蠢地咁話如果唔係星期五過夜要過weekend就出濕倉啦,好彩即時有兩位戰友為我糾正,先至唔駛全村人蠢蠢地咁靚咁值博嘅一個位都唔出淡倉。還好今日恒指跌逾200點,Slow STC(14,3)開市個位仲有得落,即市再追淡倉爬格仔亦非常OK,結果今朝都有唔少人報喜。

依家10點16分,恒指目前仲有230幾點嘅跌幅,最低位暫時做過24806點,雖然24800至24899點呢層牛證街貨嚴格嚟講係未全部被收回,不過,爭嗰6點就由佢啦,換言之恒指今日計住殺咗首三層街貨,相相當於524張期指,最貼價層落到去24700至24799點,呢度有928張期指,再落多一層,即24600至24699點就係牛證重貨區,有相當於1189張期指。

睇埋恒指日線圖,其實同50天線嘅距離又再遠咗,Slow STC(14,3)兩線仍然勢頭向下,由於指數目前處於五條平均線以下水平,唯有開個保歷加通道出嚟睇,見到保歷加通道口係有收窄嘅,不過目前 保歷加通道底線為24530點附近,以目前恒指現價計,唔通指數真係要殺到落到保歷加通道底線先識停?

恒指Put(25874),行使價24400點,同現價有逾2.2%價外,低引伸、高槓桿,又等下恒指五分鐘圖Slow STC(14,3)上得返去超買時,出桿釣魚啦。

作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。

即市聊天室/Patreon:https://www.patreon.com/cbbcwar
FB:https://www.facebook.com/cbbcwar

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads