噚日揀咗隻恒指熊(66979)出嚟,本身打算吼返恒指五分鐘圖Slow STC(14,3)上返去超買,或者進取嘅吼指數彈上50分鐘線(五分鐘圖10線)時落場,最終等到下晝3點20分見恒指忽然彈高,喺五分鐘圖上見指數出咗支「大陽燭」後,指數繼續再上,終於喺2點25分至2點40分Slow STC(14,3)上到嚴重超買水平,呢個時侯偷位出隻(66979),以當時高低位0.06元/0.051元計,平均買入價為0.0555元。雖然指數之後稍為回落,但喺五分鐘圖上見指數有50分鐘線(五分鐘圖10線)做咗支持,去到臨收市前10分鐘先至見指數微微跌穿100分鐘線(五分鐘圖20線),Slow STC(14,3)都係由此前超買水平回返落去中軸位置,呢個時侯走隻(66979)唔過夜的話,以臨收市前10分鐘(66979)高低位做過0.057元/0.056元計,平均沽貨價為0.0565元,一格,隨時手續費都唔夠比。
指數開市後喺25100尾段至25200頭段上上落落,而Slow STC(14,3)就Keep住喺高位橫行,去到依家10點2分,情況都係一樣。市未有太大轉變時,聊天室戰友都會傾下閒計,頭先就講到關於我噚日收市後衝落樓睇醫生,等佢出信轉我去心臟科,大家都問我今日情況如何。唔係個個聊天室都嗌晒交嘅,都可以好有愛嘅。
依家10點21分,指數開始有高開低走嘅走勢,並作勢補回今朝嘅開市裂口咁款。留意返日線圖今日恒指其實都仲受制於20徵線同50天線,同時10天線都開始向下回落,靠近返20天線同50天線,一旦三線滙聚的話,恐怕恒指受壓嘅力度唔細,唯一希望嘅係指數會因為現水平靠近熊證街貨,喺街貨VS技術分析之下會進行突破。
恒指牛(64219),收回價24658點,同現價有逾500點差距,接近50倍嘅槓桿就算唔等日線圖出現突破,吼五分鐘圖Slow STC(14,3)回落到超賣水平而出swing trade嘅話,都已經夠用啦。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。
即市聊天室/Patreon:https://www.patreon.com/cbbcwar
FB:https://www.facebook.com/cbbcwar