噚日揀咗隻恒指Put(20294)出嚟，諗住吼五分鐘圖Slow STC(14,3)上得到超買位時落場啦。結果除咗喺下晝1點零5分Slow STC(14,3)兩線上到80以上之外，就要等到收市前嗰五分鐘先至再見到Slow STC(14,3)兩線上到70以上，去到U盤做完之後先至見依家嘅80以上水平。嚟到今朝開市，見恒指再彈多19點開市，報25648點，將五分鐘圖上嘅Slow STC(14,3)進一步搶高至90以上水平，唔通等至今日(20294)先至可以出動？睇電腦右上角個時間時都有show埋今日日期，今日除咗喺我中學老友阿賢生日之外，仲係期指結算日，按非官方正式統計，期結日十居八升，但見恒指現價同上方熊證最貼價嗰層26000至260699點都有成300幾點差距，仲要彈咁高先食得168張期指，但向下落牛證第一層25500至25599點只係需要動用百零點嘅力，但可以食到218張期指。就算再秤牛熊兩邊各自第二層，街貨量都係牛證比熊證多，唔通今日嘅期結日，恒指要行出少見嘅跌市出嚟？
嚟到9點31分，恒指正式開市，先見恒指倒跌返10幾點，但去到9點35分就見指數跌幅擴大至跌50點，重返牛證第一層街貨，即25500至25599點嘅範圍；而喺五分鐘圖上則見Slow STC(14,3)稍回至70幾呢個位。再過多9分鐘，指數已經二話不說地彈返上去，反升逾90點，指數上到25700點以上，喺五分鐘圖上見保歷加通道口已經拓闊，同時指數已經上破保歷加通道頂線，(20294)可以再瞓多陣，隨時又要變陣。
就嚟10點，指數今朝首半個鐘喺升同跌之間來回咗一轉，喺五分鐘圖上見指數暫時受制於500分鐘線(五分鐘圖100線)後回落，聊天室戰友已經先牛後熊爬格仔走咗一趟。換個小時圖出嚟就見到指數都有條10小時線(小時圖10線)頂住， Slow STC(14,3)唔通今日都繼續行超賣再超賣？
過多10分鐘，恒指仲未見有異動，喺五分鐘圖上畫到個「三角形」出嚟，咁唯有等下先。噚日老友強少send咗張圖比我，係偉大嘅成龍大哥喺快手(01024)登場，到底大哥「點燈」能力勁啲，定係秋官呢？「但今日見快手仲有得升喎」，咁恒大(03333)都唔係一上市就爆煲啦，食住花生先。
嚟到10點20分，五分鐘圖「三角形」終於都行完，但指數仍然受制於500分鐘線，怕且今日借期結出好倉要等下指數破唔破到呢個位；最理想就梗係連小時圖都上到10小時線啦！至於隻(20294)，或者都係放返入雪櫃好啲。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
FB：https://www.facebook.com/cbbcwar
