還好噚日快放走隻恒指熊(54362)，如果唔係之後恒指向上爆上升過百點時，隻(54362)唔止瘦咁簡單，直情得返排骨。
今日係林鄭任內最後發表《施政報告》嘅日子，根據市場無定向統計，每逢林鄭出場時(周二行會除外)，大市往往都係向下走；今朝開市雖然恒指升155點，不過，高開低走格局出現，依家9點47分，恒指已經由升轉跌179點，報23924點；幸好喺聊天室上面喺開市無耐都有叫出淡倉，不過，點搶同搶唔搶到都真係只有你先可以控制得到。
我家肥貓呢期玩抓抓板玩得好高興，抓晒啲紙皮出嚟，執餐死唔緊要，最怕佢吞咗落肚啫。執完紙皮之後再睇返個市，跌幅擴大咗，依家10點6分，恒指再向下跌逾200點，本身今朝開市口價近熊證街貨層(最貼價24300至24399點)，但依家又變返近牛證街貨層(23600至23699點)。
指數都碌咗落去，今朝追到嘅等收工，未追到嘅等位入，喺等嘅時侯又睇咗牛熊證街貨圖先。牛熊兩邊最貼價層如上，中間位大約24000點左右，而牛證首兩層最貼價街貨每層都有逾800張期指喺度，而熊證首兩層最貼價因為係新增關係，所以街貨量都唔算太多，呢兩層加埋先得嗰400幾張期指，等於牛證最貼價層總數嘅一半。
依家10點16分，恒指似有跌定嘅情況，唔肯定係唔係等林鄭份《施政報告》所以暫時抖一抖先。喺小時圖上見今朝出咗「大陰燭」向下行，依家第二粒燭已明顯見指數落返去保歷加下降通道運行，Slow STC(14,3)兩線當然勢頭呈下；再加上依家恒指又靠近返多貨嘅牛證區，似乎依家要搵位落淡倉。
一如以往，用返五分鐘圖，依家Slow STC(14,3)係出緊超賣再超賣架啦，進取嘅都要等50分鐘線(五分鐘圖10線)向下回到落指數附近時，如果成為阻力嘅話先至出手淡倉，否則退後多一步，比多條100分鐘線(五分鐘圖20線)佢；安全嘅當然可以等返條Slow STC(14,3)上返去超買水平時先至出手啦，但可能到時已經係Lunch time 之後嘅事嚕。
邊隻熊？雖然(54362)同現價有逾500點，為市場上最貼價、最高槓桿嘅熊證係好吸引，不過15%以上街貨...唔算多，但相比之下有其他街貨低啲嘅可以揀嘛，恒指熊(54707)，收回價都係24390點，同現價有逾500點差距，都係市場上最貼價嘅熊證，不過街貨就低(54362)好多。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
