今朝出奇地我家肥貓喺就嚟開市時落地，仲要想走過嚟搵我同佢玩推手，難得咁熱情、咁主動，就唯有同佢玩一陣啦，玩完之後我都望望鐘，9點30分，唯有同你講句：肥貓，開市啦，自己同自己玩住先啦。
依家9點33分，恒指開市微升13點，開市報25827點後，喺五分鐘圖上見指數暫呈「十字星」；由於噚日恒指尾市跌幅收窄，所以Slow STC(14,3)都上返去超買位，不過「十字星」出嚟之後，都開始見到Slow STC(14,3)開始見高位回落，忽然覺得個天好暗，望望窗見到肥貓望住街，哦，原來落雨；還記得喺聊天室時有位戰友話一落雨個市就會跌。
轉個小時圖睇，本身同定班戰友講話如果小時圖過唔到保歷加通道中軸的話就開淡倉，不過，依家9點43分，見恒指升轉跌53點，報25760點，喺五分鐘圖上見一支都大大地嘅陰燭向下殺落去，牛熊證街貨圖未睇嘅，但都估到再係咁向下走，指數只會愈殺愈多牛證街貨，諗都廢事諗直接開淡倉好過，那怕只係爬格仔。
依家9點54分，仲有6分鐘小時圖上就會出今日第二粒燭，趁呢個時侯望望牛熊證街貨圖先，見到今日兩邊都無新增牛熊街貨層，牛證最貼價層為25500至2599點，呢度有相當於747張期指，至於熊證最貼價層為26200至26299點，呢度係最多新增嘅熊證街貨層，有相當於494張期指。計計中間位耳係(25599+26200)/2=25899.5點，以依家10點正見指數跌79點，報25734點計，指數仍然靠近牛證街貨層。
個天愈嚟愈黑，不過都未見恒指瘋狂向下，反正都10點，開個小時圖見今日第二粒燭目前仍處於保歷加下降通道範圍，暫且都可以視中軸為阻力位；換返個五分鐘圖就見指數今朝出完「十字星」後向下走，落返去保歷加下降通道後運行，只係仲未見到保歷加通道口有拓闊，或者係整條保歷加通道向下。
等到依家10點11分，本身諗住見指數靠近牛證街貨，又好似噚日咁出熊證向下殺落去腦開鬆啦，但見到恒指五分鐘圖上見保歷加通道口收窄，還好戰友們早已開淡倉，依家先嚟追嘅話，最多都係博指數喺五分鐘圖上破唔到保歷加通道中軸啫，不過值博率真係偏低，都係陪下肥貓算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
