噚晚同咗兩位型男Coffee Time，一個係N年前同我一齊睇黃國英Talk Show嘅前半個行家(正確嚟講應該係研究部啲人)，另一個係識咗N年嘅輪商朋友，不過佢依家都離開咗輪商呢行。三個人短聚，傾下各人行內嘅事，又講吓依家個市，約定下次再見。
趁仲未完U盤，先睇咗今日恒指牛熊證街貨圖先，見到今日有兩層新增牛證街貨，最貼價追返上26000至26099點，貨量唔多，有相當於70張期指。而熊證最貼價層26400至26499點就縮到得返28張期指，明嘅，太近嘅話走人為上亦係合理。不過，再上多一層，即26500至26599點就有成549張期指，近現價嚟講，呢層都咪話唔吸引。
今日我家肥貓有啲唔老嚟，已經Fee少咗好多，今日無啦啦又Fee我同我家老爺幾嘢，算啦，反而貓咪嘅心同少女一樣都係咁飄忽。
終於都等到開市，開市報26396點，升43點。開市後有一下上過26400點樓上，嚟到依家9點38分，升幅又再收窄返。開恒指五分鐘圖就見到保歷加通道原來都同步收窄中，唔通今日恒指同我家肥貓一樣，都係玩飄忽？
覆完我家老爺嘅Message之後，見到恒指終於叫做有個方向出嚟，同步見五分鐘圖保歷加通道口都拓闊，至於Slow STC(14,3)擾攘完一輪之後，%K線同%D線喺中軸範圍兩線呈上，截至依家9點47分止，恒指最高做過26524點，換言之第一層熊證街貨26400至26499點全數死亡，最貼價層再向上推到26500至26599點。以依家恒指嘅水平，向上追殺26500至26599點全層亦可能係今日目標。
話分兩頭，Slow STC(14,3)喺五分鐘圖上處於中軸範圍，其實無論向上抑或向下，都唔係一個好靚嘅入場位，除非係要不問價地去追，否則都係寧願等返條Slow STC(14,3)回落，或者進取嘅等指數回返落50分鐘線(五分鐘圖10線)或100分鐘線(五分鐘圖20線)先至出手會比較安全。
恒指牛(67232)，收回價25768點，同現價有約600點差距，槓桿約有46倍夠DT用，低街貨都係賣點之一，用返上面提過嘅位置嚟吼位入場；留意嘅係日線圖上依家恒指頂住條50天線(約26573點)，就睇下指數有幾狼死，殺26500至26599點全層熊證街貨嘅決心有幾大啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
