噚日揀咗隻恒指牛(59787)出嚟,但由於見到噚日恒指五分鐘圖見保歷加通道有收窄嘅情況,而且至上半場完半前指數都未見有力向上走返上去,Slow STC(14,3)有啲腳軟,所以去到噚日上半場完場前指數都係處於保歷加下降通道運行;再加上小時圖見指數喺保歷加通道中軸真係遇阻,所以本身入(59787)嚟博小時圖上破20天線呢個如意盤算打唔響,處理嘅方法同入波一樣,一係入一係唔入;一係Hold一係沽。
其實去到下晝2點,小時圖再出多支陰燭,同保歷加通道中軸進一步遠咗嘅時侯,都知道(59787)隨時要棄守,以當時(59787)喺2點至2點5分高低位做過0.056元/0.053元計,平均走佬價為0.0545元,呢round平均輸8.4%,「如果揸到過夜,揸到依家9點49分有逾400點升幅,就一天都光晒啦!」係因為你見到今日個市咁樣先至咁講啫,輪證同正股唔同,前者帶有條款,有時侯唔係你唔想守,係擔心條款令到你守都無用。
唔緊要,再接再勵啫!依家9點51分,出面又真係落大雨,我家肥貓準備瞓覺,而恒指依家愈上愈有,10點未到仲上破埋25600點添,而呢個位同恒指熊證第一層25700至25799點都仲爭大約100點嘅距離,會唔會一口氣再上?有啲難度,事關五分鐘圖上嘅Slow STC(14,3)兩線都已經喺嚴重超買水平,唯有等一 陣睇睇指數會唔會回一回落,比個機會偷到個位出好倉啦。
喺未等到指數有好嘢之前,又去八掛下啲個股,業績期只係過咗一半,仲有大把個股排住隊等出業績,聽日就輪到小米(01810)出業績啦。
日線圖見今日小米股價隨大市上行,並重返10天線以上水平,Slow STC(14,3)兩線勢頭呈上,呢兩日(計至今日依家10點21分)嘅陽燭有少少美中不足嘅係上影線有啲長得滯,即暗示好友曾經努力過,但不敵淡友進攻而留低嘅一道疤痕。開埋保歷加通道就見到底線有上行嘅情況,一旦業績優於預期的話,或會成為股價催化劑。
小米牛(56967),收回價23元,同現價有逾8%差距夠晒安全,槓桿約9倍,吼小米五分鐘圖Slow STC(14,3)回返落超賣水平時,小注進場。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。
Patreon:https://www.patreon.com/cbbcwar
Facebook:https://www.facebook.com/cbbcwar
秒投聊天室:https://bit.ly/31HG6AN