周初中港股市暴跌，究竟「局部牛市」會否終結，當然最重要睇實創業板指數，好彩周三創板低見3157便止跌回升，周線圖總算首穩升軌，危機算暫時解除(圖一)。
危機暫時解除，但科網股依然陷彈散局。去年底筆者已提出要避開銀行、科網股，到呢刻睇法依然未變，原因是息差下跌，以及政策打壓。
市場強弱明顯，科網股一彈即散，仲要喺直插無水花，要進入香港股市，大家必需一改過往思維，除了唔好攬實科網股，還要了解A股。正如炒美股，心態首先是要接受到無盈利企業，其次唔好睇PE，要懂發夢兼睇PS，還要看現金流。
儲能受惠政策扶持
講番股市，港美科網中概股弱到痺，簡直喺地獄，但新能源股強到無朋友，今日連風電比例唔多的華潤電力(00836)也開香檳，可見新能源股是資金泊錢首選。
值得留意是內地光伏變頻股，上日陽光電源(300274.SZ)與固德威(688390.SH)狂升兩成，今日接力再飆，全日分別升6.9%和8.7%。最初唔知原因，原來內地今早媒體陸續報道，發改委擬推新政策，促進儲能及新能源發展，結果有春江鴨早一步落手。
儲能呢個話題，本欄上周五已經題出，實在相當重要的投資主題，建議大家可重温上周五「3134+電池ETF砌儲能組合」文章。除了用3134+電池ETF砌儲能組合外，信義系於創業板上市的信義儲電(08328)，都勉強算喺儲能股，但平時買賣差價大，平時成交亦少，唔算一個好選擇。
除了大路新能源股已經被發掘外，內地券商開始發掘有關興建光伏及風電的基建股，中冶(01618)便是一個好例子，單是本月大升近三成；還有A股的中國電建(601669.SH)今日勁得升停板，本周急升25.8%。
揾第二隻中冶
除了中冶及中國電建外，港股還有一隻可以諗吓，當然唔喺中鐵(00390)、中鐵建(01186)及中交建(01800)，答案喺中國能源建設(03996)。
中國能源建設2015年12月香港上市，中國能源建設集團於香港上市公司，即喺國企，業務包主打能源電力及基礎設施建設，包括興建水電、風電、核電、光伏電站及輸電網等，其實與中冶及中國電建差不多。
睇番集團2020年年報，現時在建項目包括除了湛江海上風電及珠海金灣海上風電場外，海外還有烏克蘭光伏電站群、越南風電項目(圖二)。重大簽約項目方面，去年獲得廣東華電海上風電項目、墨西哥光伏電站項目，而近期通告則稱獲得阿根廷丘布特省風電項目等等(圖三)。
對比中冶與中國能源建設毛利率，市場估中國能源建設有望今年可達13.4%，比中冶10.9%高，更重要是現時預期今年中國能源建設市盈率只有3倍(圖四)，預期股息率達5.9厘，比中冶的4.4倍和4.6厘(圖五)更平。
策略上，現值已經值得小注買入，目標睇4倍預期PE絶對唔過份，即0.96元，跌穿0.66元要止蝕。
作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文，另每逢周二在《信報》撰寫「美股歷奇」。
（編者按：信報分析團隊羅崇博、尹德政、陳鎮強最新著作《勢在必行：活用全方位價值趨勢信號》現已發售）
歡迎訂購實體書 電子書：https://bit.ly/ejbook141
