噚日港股上演「黑色星期一」(Black Monday),都唔知有幾多股民喺度哭股喪;不過去到夜晚香港運動員張家朗喺劍擊項目中奪得奧運金牌,成個香港嗰種興奮同叫到拆天嘅氣勢,就嚟連深圳都聽到。呢單嘢真係振奮全港所有香港人!(香港好似好耐都無咁高興嘅事發生過啦)
尾市睇住恒指愈跌愈有,恒指熊(50207)噚日策略係「不如等到小時圖Slow STC(14,3)低回確認回升先散水啦。」結果根本喺小時圖完全搵唔到Slow STC(14,3)%K線高走於%D線,呢一注過唔過夜最後就無講底,大家隨心啦,但係我相信見住個市跌夠1100點收市,可能好多人都會選擇唔過夜,怕今日恒指會彈返上去,就當喺尾市15分鐘走隻(50207),以當時高低位做過0.117元/0.112元,平均沽貨價為0.1145元,同噚日朝早偷位入(502047)嘅平均價0.065元比,勁食76.15%!相信呢個係自有記錄(我都係今年年頭先開始同自己做【月度報告】)食得最狠嘅一次,亦報咗上兩個星期隻港交牛嘅仇。
今朝早開U盤無耐,我位親愛嘅designer Ken whatsapp我騰訊(00700)見450元,重返N年前我哋公司一位舊燈神同事Wilson當年嘅高位買入價附近,及至開市,恒指開報26011點,26000點呢個位穿嘅歡乎聲都應該好高;至於騰訊開市報465.4元,有5%跌幅。
搞完一輪invoice同來稿之後,依家10點12分,繼續寫返自己隻稿,恒指依家做緊26095點,跌96點,中段有見過轉燈,但喺五分鐘圖上見指數幾度闖100分鐘(五分鐘圖20線)關口都闖唔過,都等咗差唔多45分鐘先見到SLow STC(14,3)由嚴重超賣水平上到去中軸位置,始見%K線回頭向下插穿%D線,於是喺聊天室同戰友們講可以試出淡倉,但都要小心26000點呢個位會唔會見「哪裡來的支持」。
依家10點27分,26000點都已經失守埋,隻(50207)今日見有成18%嘅街貨,最貼價熊證之中街貨最多(咁即係其實真係唔係好多人過夜咋喎),但22倍槓桿又係市場最高,如果你打算做Day Trade嘅話,咁更係取槓桿高啲嗰隻啦,(50207),收回價27160點,同現價有1067點差距(我唔想架,但真係最貼價啦),吼恒指五分鐘圖再破唔到100分鐘線就偷位小注出場。
籌備咗一年有多嘅一書四冊新電子書終於喺兩個主要嘅電子書架(有PDF同Epub版本)都上晒架啦,PM我都可以買嘅(PDF版本),多謝。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。
Patreon:https://www.patreon.com/cbbcwar
Facebook:https://www.facebook.com/cbbcwar
秒投聊天室:https://bit.ly/31HG6AN