噚日偷位摺隻殘爆銀娛(00027)Call(13125)，估唔到恒指跌幅收窄推到隻銀娛由跌轉升，不過由於本身對吼銀娛呢單嘢都只係抱住一個踩鋼線嘅心態，所以先出動隻無收回機制嘅(13125)，槓桿唔算特別高但個零鐘都執到11.6%賺幅，「哎呀！早知揀隻貼價牛啦！可以拉大啲個賺幅嘛」說話又唔可以咁講嘅，有早知就唔會有乞衣啦。
今日終於都放晴，天朗氣清之下恒指今日都造好，開市報27464點，升239點，勢頭好到開市時連日線圖條Slow STC(14,3)都轉埋勢，無他嘅，近期恒指兩度下試250天線，結果都只係出咗條下影線穿一穿就收工，暫時都反映到條250天線有支持嘅力度。再望埋隻銀娛，日線圖Slow STC(14,3)已經確認轉勢，噚日喺【輪證下半Part】都有講過，如果打算以日線圖追銀娛嘅話就可以等埋日線圖Slow STC(14,3)觸底回升之後先出手，採取呢個策略嘅話(13125)今日見返啲條款仍然可取。
依家9點48分，見到恒指升幅已經火速擴大至升逾300點；再過多10分鐘已經升上逾400點，曾經踩過入熊證第一層街貨27700至27799點，呢度有相當於236張期指。其實今朝恒指一早開市時已見五分鐘圖Slow STC(14,3)彈到上超買水平，依家仲出緊超買再超買，真係無辦法喺一個咁高嘅水平出好倉硬追，依家真係唯有等條Slow STC(14,3)冷靜返再算，反正喺日線圖上見指數有一下破咗10天線但又回過，都唔知班好友先鋒夠唔夠力頂得穿佢。
繼續向個股尋寶，雖然今日恒指彈升逾400點，不過都仲搵到啲價殘準備轉勢或者啱啱轉勢嘅股價，一隻應該好少講嘅就係微盟(02013)。
截至10點23分止，微盟已經彈高8%以上，但見到日線圖上仲未見到有明顯嘅升勢，仲見到今日粒陽燭嘅高位低於噚日嘅陰燭，低位則高於噚日嘅低位，隨時出低位「身懷六甲」轉勢都唔奇；再加上Slow STC(14,3)數值上已經確認低位回升，冷冷地吼佢快手執一趟都未嘗不可。
睇睇今日微盟嘅Call，唉...真係想講粗口，最貼價都同現價有逾37%價外，極度價外Call真係咪搞，唯有向牛證出發，市場上都只係得四隻微盟牛(你睇下冷到咁)，最貼價嘅(69384)，收回價9.8元，同現價有約7.7%，依家10點37分，五分鐘圖出咗「圓底」走勢又再上過，而小時圖作勢上破保歷加通道中軸，擔心用冷門嘢追升嘅話，又等等小時圖有無力再破位上，比多少少信心你去追。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
