仍然有半夜壓醒嘅情況,不過還好,今次壓醒咗之後瞓得返,不過之後就發咗個「怪夢」,是但啦,番瞓得到已經算係咁。
本來噚日打算喺小時圖上確認到恒指轉勢後,就小注出隻恒指牛(58280)碰碰運氣,但由於小時圖見恒指都後處於橫行走勢,喺未見明顯訊號出現下,最後都係無做到任何動作,純綷用噚日朝早隻恒指Put(22380)做trade就算。
依家10點10分,恒指開市升60點後喺升與跌之間浮浮沉沉,開五分鐘圖就見到恒指保歷加通道仍然keep住噚日嘅闊度,就算開埋其他分鐘圖,至小時圖都見到指數都係處於橫行狀態,確實零頭緒,唯有試下由個股方向著手。
第一隻搵嘅就更係騰訊(00700)啦,今朝都有同聊天戰友分享,話U盤後騰訊五分鐘圖見股價頂住500分鐘線(五分鐘圖 X 100線),但到開市之後騰訊股價幾近直線飆咗上去,只係未到$600就見SlowSTC(14,3)兩線上到90以上水平;換個小時圖就見騰訊股價今日重上保歷加通道中軸,不過係踩仲住條線,未係完全確認爬得返上去,而SlowSTC(14,3)都由噚日嘅嚴重超賣水平回升至中軸位置,順勢的話空間仍有,只不過應該等五分鐘圖冷靜一下先至出好倉,再轉返用小時圖去追,keep住留意住五分鐘圖同小時圖嘅變化啦。
碌咗幾隻之後,去到阿里巴巴(09988),咦?今日公布季績喎,怪不得先嚟一個裂口高開,至依家10點27分升4.4%,跑贏恒指。
五分鐘圖上見阿里保歷加通道口拓闊呈上,SlowSTC(14,3)當然兩線都升到嚴重超買水平啦,換天線就見50分鐘線(五分鐘圖 x 10線)上咗嚟接住股價;再換小時圖見股價依家重上20小時線(1小時圖 x 10線)之上,SlowSTC(14,3)勢頭上行中且水平比騰訊的還要低啲(即如果順勢的話,再上行空間會更多)。
轉台睇埋日線圖,噚日裂口下跌,今日裂口上升,兩個裂口夾住噚日公陰燭,反映市場對阿里股價有啲over reaction,SlowSTC(14,3)都見%K線低位升穿%D線
阿里牛(52219),收回價$206,同現價有逾4%差距,換股比率100(我都想揀隻換股比率500,因為證價細啲,但街貨又好鬼死高),唔敢上望太多,日線追得上10天線($220.7)已經可以還神。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
Patreon:https://www.patreon.com/cbbcwar
秒投輪證教室:https://bit.ly/31HG6AN