噚晚同咗個中一同學喺屋企樓下粥檔食粥，其實我哋每隔半年就會見到對方，因為我哋嘅生日日期立剛好相隔半年。「生日飯食粥？」係呀，對我嚟講從來食乜都唔係重點，重點係同邊個人一齊食啫。
噚日條【輪證下半Part】真係好勇敢地出自已同師兄張相做Opening Photo，但重點在於噚日隻恒指牛(52072)，落咗場之後真係等到痴呆，還好等到2點5分至2點50分，恒指五分鐘圖上SlowSTC(14,3)上到90以上嚴重超買水平，按呢段時間(52072)高低位做過$0.043/$0.038，平均沽貨價$0.0395，對比噚日平均買入價$0.4，是但啦，成村人已經個市下半場磨到死咗啦。
望返今日個市，依家9點29分，恒指做完U盤開跌159點，報29143點，五分鐘圖上恒指已經出現好大個裂口，唔難估到當正式開市後恒指跌幅會先擴大。到正式開市後見到恒指一度跌逾250點，不過好收就收窄返個跌勢，五分鐘圖上見到指數失守各主要平均線，唯獨是750分鐘線(五分鐘圖 X 150線)似暫時有支持。
再去到9點38分，指數又忽然再次下行逾200點，從30分鐘圖見到指數今日開喺保歷加通道中軸以下水平，小時圖今朝呢一支燭亦都係踩住保歷加通道中軸而開，按照呢啲訊號係應該出淡倉，好彩每朝早未開市之前都會揀定牛熊比聊天室班戰友啫。
話口未完，恒指喺9點44分失心瘋急跌逾300點，我都忍唔住對住個電腦「Woo~」咗一下，SlowSTC(14,3)由開市時嘅中軸水平被搶低至超賣至嚴重超賣位置，五分鐘圖上所有天線終告失守，保歷加通道口繼續拓闊。
換個10分鐘圖就見到指數keep住跌穿喺保歷加通道以外水平，而保歷加通道口keep住拓闊；至到小時圖一大支陰燭橫跨保歷加通道上升同下降通道，恒指熊(50464)，收回價29568點，同現價有逾400點差距，槓桿58倍適合用小時圖做今日Day trade；要小時嘅係小時圖上指數雖然未到保歷加通道底，但100小時線(28879點)又好快到，安全啲可以等恒指五分鐘圖SlowSTC(14,3)上返超買位，甚至進取少少如見到50分鐘線(五分鐘圖 x 10線)有阻力嘅話，就出手啦。
我知今日係萬人迷姜濤生日，珊姨姨祝你快啲學識投資理財，完成你嘅業主夢；不過，今日都係聊天室戰友戒急用忍嘅太太生日，阿嫂，生日快樂！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
