正當噚日仲懷疑緊自己嘅運氣之時，收市後美團(03690)宣布以先舊後新方式折讓約5.3%，即每股273.8元配售1.87億股涉約66億美元；另發行近30億美元可換股債券。呢單嘢 搞到成班戰友已經講晒粗口；再加埋今朝開電視見到日經跌逾500點，即刻變咗卓韻芝：唔好啦！不過，反轉頭諗應該幸慶自已噚日立斬咗隻恒指牛。
今朝喺巴士上恒指完成咗個U盤，跌143點，又唔係我想像中跌得咁多喎，部份戰友坐過好倉過夜都可以定一定神，事關開到恒指小時圖見指數仲守得住條20小時線(1小時圖 X 10線)就OK。
返到公司一出升降機就見到公司嘅Pantry CEO珠姐，「見到你就啱啦！」噚日喺公司珠姐講過話整十零個合桃牛油cup cake返嚟，事關臨別秋波，佢整嚟比我同我team同事開心share；重點係，其實離開公司嗰個人係我，唔係佢，而我係訂咗散水餅架！珠姐，預咗你架！嗰日記得返工呀！
依家10點21分，同同事開心share完，再同新同事交代多少少工作，見到恒指跌幅大為收窄，好彩喺較早前叫定聊天室戰友如果好倉坐咗過夜的話，應該收隊，而家再睇恒指五分鐘圖，10點時恒指上到250分鐘線(五分鐘圖 X 50線)出「十字星」不破後回落，至10點20分再嚟多次，不過今次係500分鐘線(五分鐘圖 X 100線)出「十字星」。
換上小時圖，見到今朝守得住嘅20小時線仍然健在，不過，恒指頭頂就有條10小時線(1小時圖 X 10線)頂住，SlowSTC(14,3)就暫時仍喺70附近喘定，小時圖係會抖得比分鐘圖耐啲嘅，明白嘅，之但就連五分鐘嘅保歷加通道都開始橫行，叫人點玩先？
指數暫無方向，唯有向個股埋手，但真係搵咗好耐都未到搵一隻啱心水嘅，直至搵到京東(09618)，昔日嘅焦點股由2月中高位$422.8落到依家$300都無，真陰功。日線圖見京東SlowSTC(14,3)兩線落到超賣至接近嚴重超賣水平，換上保歷加通道就見到股價沿保歷加通道底($292.76)運行，就將佢放入watch list度先，等SlowSTC(14,3)出現鐘擺之後先再出手。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
