今朝起身睇新聞時先見到原來今日係4月1日，除咗係愚人節同第二季嘅開始之外，亦都係張國榮嘅忌日，佢當紅嘅年當我老媽都仲係少女，我對佢最大嘅印象怕且就係我返緊學嘅途中，喺地鐵上見到佢跳樓嘅新聞；同埋老爸喺屋企間唔中會開行佢套HiFi「熱播」佢嘅歌。
噚日喺恒指科指度搵食，隻恒科熊(68059)都只係trade咗兩粒鐘到就收工，事關miss咗朝早嗰part大跌之後，恒科指幾近橫行，要偷位都真係唔易。
對於唔能夠可以時時刻刻追得個市太貼嘅老散嚟講，噚日喺【輪證下半Part】都提供咗另一個玩法，就係留意恒科指日線圖今日剷唔剷得返上20天線，事關喺日線圖上見恒科指行咗「頭肩底」出嚟，頸線又剛好喺20天線呢個位，如果今日過到，就可以試開長Call，睇下假期後返嚟復唔復活到。
依家10點8分，恒科指做緊8448點，升265點，日線圖上重返20天線之上。恒科Call(18853)，行使價8628點，同現價有逾3%差距，5月底到期夠玩一個禮拜，只不過係要等恒科指五分鐘圖條SlowSTC(14,3)由依家嘅超買位落返去超賣水平先好入場。
恒科指咁乖，都係多得ATMX今日跑贏大市，截至依家10點15分止，美團(03690)升幅最強，逾5%，只可惜日線圖上仍受制於保歷加通道中軸，呢個情況喺騰訊(00700)同阿里巴巴(09988)嘅日線圖上都有出現，反而由方變圓嘅小米(01810)行得相對最靚；但係小米有無得再玩落去呢？【輪證下半Part】續。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
