噚日冒險開小米Put(21761)兼率先斬走騰訊Call(23037)，由於小米Put係用日線做部署，所以噚日都無咩意欲收割(2點幾嗰段時間，五分鐘圖條SlowSTC(14,3)係殺返落最底架)，hold到依家，日線圖見小米股價已確認喺100天線($27.64)擦身而過，SlowSTC(14,3)高位回落呢個勢就更加係keep住行，仲行得幾靚架，呈小圓頂咁。
截至依家9點56分止，小米股價最低做過$25.3，剛好有條10天線($25.175)支持住，但留意頭頂除咗有條100天線之外，50天線($27.703)如噚日所講成粒彗星就嚟撞向球咁款，隨時50天線跌穿100天線，出「死亡交叉」。
依家10點13分，同同事研究完今朝疫苗單新聞之後，見到恒指一下子向下插逾400點，28100點失守，好彩一早同聊天室戰友們講定，過夜熊keep住，無貨再開淡倉啫，如果唔係又無咗個舊「叉燒」。
其實今朝恒指低開之後有一段短時間無乜方向，但見恒指牛熊證街貨圖就會認為開淡倉嘅值博率係比較高啲，點解？因為由第一層28300至28399點開始，至到28000至28099點，呢四層其中有三層街貨量相當於過千張期指，而按噚日恒指收市價28497點計，難得咁近又咁重貨喺度，下個星期就月結+季結，仲唔拿拿聲收割晒佢，第二季之後又一條好漢啦。
「恒指咁跌得嘅？今日騰訊(00700)業績喎，唔係唔比面呀？」Well，去到依家10點22分騰訊都只係跌得嗰1蚊，其實已經比咗面架啦，因住恒指連28000點都無埋，直奔27800至27899點嘅1848張期指重貨區添呀！因為呢個位就係日線圖嘅100天線(27889點)。
本身有淡倉的話(唔一定係(21761)嘅)，可以keep住先；無的話，恒指熊(51261)，收回價28951點，同現價有逾700點差距，市場上最貼價熊證之中，槓桿最高嘅熊仔，進取嘅吼恒指五分鐘圖上撞到50分鐘線(五分鐘圖 X 10線)或100分鐘線(五分鐘圖 X 20線)先至出手；兩條線都比定出嚟係因為呢啲玩法隨時波幅收窄，跟住50分鐘線同100分鐘線隨時重疊，到時就要視乎保歷加通道有幾闊啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
