識我嘅朋友都知我住邊區,無錯!就係一到春天就會濕到連度牆都會喊嘅地區,屋仔細細兩部濕機+一部浴室寶幾乎7X24咁輪流開住,無計,寧願交電費都唔想啲嘢發霉;而我依家喺公司聽住隔離team兩個developer肥仔講如何用件衫遮肥腩...(咁我都唔係時時刻刻講啲好有養份嘅說話嘅)
依家9點54分,同事慢慢陸續返嚟,啱啦,噚日同我老家爺落街買嘢時佢又買咗我早排勁抽嘅Hello Kitty朱古力蛋比我,佢哋返嚟就有人幫我食咗隻朱古力蛋啦。喺未拆開隻蛋之前,見恒指今朝早高開之後升幅一窄收窄,但收窄緊嘅同時,五分鐘圖今朝SloSTC(14,3)就向上,呢個背馳嘅走勢直至到依家,終於都見恒指踩住保歷加通道中軸再次上行,而SloSTC(14,3)都已經修整返,只不過保歷加通道目前太窄,就算踩得住中軸博上行,但行兩步就到頂,有啲難搞。
未知恒指想點,都係睇咗牛熊證街貨圖先,依家見牛熊兩邊今日都無新增街貨層,以最貼價熊證29400至29499點,同埋最貼價牛證28500至28599點嚟計兩邊差距仍然咁遠,而中間位就係28999.5點,其實同上星期五(3月5日)恒指收市價差唔多,不過,目測都見牛證街貨比熊證街貨還要多,所以今早都有喺聊天室講定由於「牛證街貨偏多,隨時下也都不奇」。
再望望日線圖,「死亡交叉」已出,恒指現水平上至「下降通道」頂部,SloSTC(14,3)雖然兩線低於20水平,但勢頭仍然向下,暫時叫做得條50天線(28932點)支持住,但呢個位今日都失守過。
恒指熊(51788),收回價29600點,同現價(10點37分@28773點計)有827點差距,44.96倍槓桿明顯係day trade用啦。
依家見恒指五分鐘圖條SloSTC(14,3)成條死魚一樣,安全嘅等五分鐘圖條SloSTC(14,3)彈返起;或者等指數回返上50分鐘線(五分鐘圖 X 10線)先至出手。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
MeWe/Patreon/FB/IG:輪證贏家
秒投聊天室:輪證教室