噚日揀咗銀娛(00027)Call(19469)，朝早入一轉的話已經成功trade完。及至噚日下午2點5分，銀娛五分鐘圖見SlowSTC(14,3)處於超賣水平，純綷為超賣出技術回升而入的話，呢個位實屬不錯，可惜去到2點55分至3點時，見銀娛只能上破初初定落嚟嘅50分鐘線(五分鐘圖 x 10線)，再上100分鐘線(五分鐘圖 x 20線)就即刻遇阻，250分鐘線(五分鐘圖 x 50線)亦不見跡影。按呢段時間做咗第二轉(19469)，以平均價計算，呢一注平均輸兩格；噚日可能你會覺得好唔抵，但見五分鐘圖弱到100分鐘線都破唔到，今日開市見應該會覺得：好彩噚日走咗。
坦白講呢兩日真係被個市玩死，再加埋業績期同《財政預算案》，個人都有少少疲態；不過，噚晚同師兄劉兆昌食泰國嘢，加埋今朝早搭升降機時再逗多封隔離team老細嘅利是(多謝盧生，祝你身體健康！唔買都贏！)，那怕恒指今日跌600幾點開市，開市後再向下挫多幾百點，依家10點18分，晨早已經氣定神閒同聊天室戰友講定，恒指五分鐘圖一出見低反彈訊號就開恒指牛，又係逐層逐層打上去，依家大家一條船，雖然有啲戰戰兢兢，但so far風浪中抵壘。
日線圖上見恒指今日跳水跌穿20天線(29750點)，下一步再望或者要去到50天線(28593點)先有支持，留意2月10日個上升裂口(29527點至29732)點有部份用咗今日個下跌裂口(截至10栗25分止為29532點至29833點)，裂口補裂口從來都唔係一件好事，不過事後大市總會有好大機會補得返，只係無講底幾時補咁解；同步見SlowSTC(14,3)勢頭仍然向下，兩線目前落到中軸至超賣水平，換言之大市如要再下行的話，空間係有嘅，問題只係在於今日恒指下殺至「下降通道」底部，而以目前(10點29分見)恒指陰陽燭圖上呈「錘頭」，就算唔再出現大跌，但會唔會今日稍後時間至下周都會穩定返少少？
今日星期五又係元宵佳節，要過weekend仲要顧慮咁多都真係唔係我作風，都係用返分鐘圖做day trade。
恒指五分鐘圖見大裂口向下之後出技術反彈，今朝一早出恒指牛嘅當然無問題，隨時Day trade見不過100分鐘線率先收割亦未嘗不可，SlowSTC(14,3)勢頭向上兼只係到接近超買邊皮，未正式進入超買範圍，Day Trader可以留意50分鐘線或100分鐘線有無本事做到今日嘅彈床位，將恒指彈返高少少，就好似依家10點45分咁，恒指上破50分鐘線後再次回落呢個位置，一旦上破可小注恒指牛(69897)，收回價$487.35，約40倍槓桿真係day trade好啦。
當然，若見回彈但遇到100分鐘線又見無力；又或者50分鐘線垃圾到無力做短線支持的話，今日都係熄機，早啲買定湯圓返屋企同家人過元宵算啦。
剛剛收到朋友電話，經歷過疫情重挫失業後終於都搵到工，雖然同以前做開嘅係完全唔同，不過總算係一件好事，加油呀！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
