上個星期最焦點嘅都莫過於見住一難求嘅快手(01024)由暗盤時話有$400樓上，吹到至上個星期五(2月5日)以全日最低$300收市，但對比起IPO嘅$115，仍然升咗160%。
另一單焦點都莫過於小米(01810)，前個星期仲捉到小米行緊「三角形」，本以為日線圖上有條50天線做支持，又咁鬼多人博小米變大米，點都會推返高少少個價；誰不知日線圖條20天線做咗架兩，一手將小米股價向下啪返落去，所以喺上個星期三(3日)嘅【下半Part】條題「原來個『三角形』係向下爆」講 得清清楚楚，支持位要向下移至100天線，50天線嘅強力支持如今恐變成強力阻力；如果用「三角形」量度跌幅嘅話，就度到$22出嚟；不過，呢啲量度升跌幅往往都係得嗰度字，可以到，可以唔到，多過都仲得。如果吼中小米100天線點都有啲支持而開咗好倉嘅話，去荃灣關帝廟保祐小米企得穩條100天線，順便求支簽問下小米前程，「關關帝咩事？」無架，只係噚日老友去咗嗰度求簽話好鬼準喎。
依家10點29分，市就開咗成個鐘，走勢上恒指暫呈高開低走，升幅由今朝開市升341點縮至目前嘅217點，最高暫時做過29706點，所以首三層熊證街貨全數死亡，呢度夾埋有相當於704張期指。雖然現時見恒指跌幅收窄，不過牛證街貨最貼價層為29100至29199點，仲要得嗰75張期指，對比熊證最貼價層嘅29700至29799點有629張期指，恒指回完少少之後隨時再彈過，所以都係喺聊天室叫大家出咗恒指熊嘅就要見好即收。
恒指的確有啲飄，高開後回落再回升，真係Day trade先至捉得到，耐少少時間有咩可以玩呢？今日呢一隻要多謝聊天室戰友Apple老師嘅指引，指咗我去一隻甚少睇嘅個股(我諗大家都好少睇)，就係華潤置地(01109)。
坦白講雖然我係有做過地產組，但我只知內地有「金九銀十」，有無類似香港過年時會出現嘅「小陽春」？Really don't but 我都係睇圖做trade架啦，理得佢春唔春。
日線圖上見潤地上星期四(4日)同五低位出現「破腳穿頭」，同步SlowSTC(14,3)亦於10或以下附近嚴重超賣水平徘徊，上星期五低位確認回升，今日就見再多支陽燭向上彈起，截至10點59分止潤地高位做過$32.1，剛好被條20天線($32.158)頂住。但就喺五分鐘圖上見沿住50分鐘線(5 x 10線)上行，SlowSTC(14,3)都未見有過中軸位，暫時都係沿住超買範圍游走。
華地Call(27198)，行使價$35.35，同現價有逾11%價外，已經係市場上最貼價嘅call，面對呢啲冷門嘢，揀隻貼價同成交活躍嘅始終有啲著數。小注好啦，或者見佢日線圖破位破得咁靚但又怕冷得滯，paper trade都可以，因為對住條20天線都有少忌諱。
至於上個星期五都係揀咗冷門嘢嘅領展(00823)Call(25607)，都講到明paper trade都可以，即係觀戰都得；但都照睇埋啦。五分鐘圖上見領展喺上星期五下晝2點15分至2點25分SlowSTC(14,3)落到超賣水一平，呢個時侯(25607)高低位做過$0.095/$0.093，平均價就係$0.094。其後喺大約3點15分到就會見到SlowSTC(14,3)有上過60以上水平但之後就無力再上兼下行，但股價反而都延到挺到一陣，心知不妙呢啲位放都嘗算可以平手；但如果揸到今日的話，見領展日線圖回返落10天線以下水平，SlowSTC(14,3)勢頭再見回落，就當今日開市首一個鐘內沽走隻(25607)，期內高低位做過$0.096/$0.09計，平均沽貨價為$0.093：輸一格就當係睇錯市同博傳統股嘅教訓啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
