熱門:

2021年1月11日 港股直擊 即巿股評

【輪證贏家】DT恒指牛或要進取少少

噚晚出咗單新聞話三商發行商合共逾400隻恒指輪證將會退市除牌,今次退市嘅規模都真係有史以嚟最大嘅一次。由於喺恒指成份股中包括咗美國點名制裁的中國移動(00941),所以估計三間美資發行商先至會有咁嘅行動。

噚晚都有一刻諗過咁樣退市會唔會影響到恒指?諗深一層又唔會嘅,雖然退市嗰三間都係大行,但市場上仲有其他非美資嘅發行商可以推返恒指輪證出嚟,揀輪證向來都唔係以發行商為首要考慮條件,所以對大市嚟講都唔係太大影響;恒指今朝早開市升穿28000點以示證明。

依家11點3分,咁晏先開筆係因為今朝的確有其他事忙緊,不過恒指喺28000點上上落落,又見恒指牛熊證街貨圖現價踩咗入熊證街貨,老虎蟹都開隻貼價恒指牛嚟捉佢今日向上殺啦,截至依家11點4分計,恒指最高做過28176點,換言之熊證最貼價嘅兩層街貨27900至27999點,同埋28000至28099點都全部死亡,呢兩層夾埋有相當於873張期指;再將28100至28199點分開一半嘅話,其實28100至28149點嘅熊證都已經死咗,呢度有相當於527張期指,咁即係總數有1400張期指。

睇睇恒指日線圖,SlowSTC(14,3)由上年12月31日至今已經踩住90以上嘅嚴重超買水平,即使超買再超買嘅情況出現,但由於走勢圖上保鳥歷加通道拓闊,比位大市向上走;再加上恒指愈升,愈多資金博掉頭,恒指熊證街貨數量只會愈嚟愈多,就算發行商出新輪證嘅速度由過往五日減至三日,目前計仍然未追得上恒指上行嘅速度。

的確又係一個技術分析 vs 恒指牛熊證街貨圖嘅時候,之前都有講過一旦呢個情況出現,九成九都係街貨贏,但明白到高處不勝寒嘅道理,恒指牛(57891),收回價27550點,同現價有逾500點差距,50倍槓桿明顯係day trade用。

睇返恒指五分鐘圖,其實今朝至依家11點15分恒指都係好升得,SlowSTC(14,3)淆咗咁耐先係頭先11點嗰時chok到上超買位回落,極短線留心保歷加通道中軸會唔會成為即市嘅彈床位,如果你可以有時間睇市而可以進取嘅話,隨時見到彈床位就小注入市,否則一如以往以五分鐘圖嘅SlowSTC(14,3)落到超賣先好進場。

作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。

FB/IG/Patreon:輪證贏家
秒投聊天室:輪證教室

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads