好耐都無返過嚟公司，一返到嚟一檯都係嘢，執開晒再開返部機都花咗我一段時間。至到依家10點3分，恒指低開後跌幅擴大咗，跌逾200點，但不消五分鐘，恒指5分鐘圖上已經見到條SlowSTC(14,3)低位回升，跌幅收窄至不足100點；至於上個星期話想開淡倉嘅小(01810)，依家見股價逆市上行，一度升至$30再創新高，好彩上個星期五(12月18日)話過比多一日時間觀察下啫。
再睇返恒指走勢，到依家10點112分止，恒指最低做過26424點，換言之牛證第一層街貨26300至26399點全數死亡，呢度有相當於350張期指，牛證街貨最貼價退守至26200至26299點，呢度有相當於217張期指。至於最貼價熊證為26600至26699點，呢度有相當於23張期指。再計計牛熊中間26449.5點，不得恒指一落一上之後就喺264XX呢個位徘徊啦。面對住無方向嘅大市，策略應該係點？就係唔好理佢囉！
今日冬至，祝大家&屋企人冬至快樂！身體健康！都係嗰句：今日有得收早嘅話就早啲返屋企同屋企人食餐飯，今年疫情或者令到大家少咗機會聚頭，難得可以借做節食個飯，見個面，不過都要小心，學袁國勇話齋：帶好口罩勤洗手！
星期三(23日)見！(係呀！我又放假呀！)
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon：輪證贏家
秒投聊天室：輪證教室
