今日為首日恒生科技指數輪證+期指上市嘅大日子，恒指就先高開208點賀一賀佢，但開完香檳後，咪就係一地濕晒，依家9點56分，恒指已經見倒跌，喺聊天室火速叫大家過夜恒指牛嘅先收割，再反手出熊，出手位置雖然唔係好靚，但都叫做執到份早餐食。
依家10點13分，恒指今朝做過暫時高位26662點後向下走，但以呢口價仲未完全殺得晒一層熊證，只係殺咗半層之後就向下，按現價報26442點，跌9計，同牛證第一層街貨26300至26399點都仲有一段距離。唯事實上，最吸睛嘅始終都係熊證第二層嘅26700至26799點，呢度有相當於1287張期指，只不過牛熊兩邊街貨咁近，上下其手又何樂而不為？
睇返恒指日線圖，今日暫見陰燭處於高位，截至10點24分低位做過26386點，有10天線(26343點)支持；而SlowSTC(14,3)兩線處於超買至嚴重超買水平，%K線見向下跌穿%D線，不過日線SlowSTC(14,3)出超買再超買都唔係今日嘅事。明白咁嘅技術走勢又係同緊熊證重街貨爭生意嘅時間，唔係話個市唔向街貨走(根據過往紀錄佢係向街貨方向行嘅居多)，但上一次破25000點重貨熊搞咗好Q耐，仲以為佢有神功護體，今次喺高位咁耐，咪啦，都係等佢confirm穿條10天線再穿啦，反正我又唔係趕時間。
至於上個星期睇到依家嘅中移(00941)，今日見走勢仍然疲弱，日線圖上SlowSTC(14,3)兩線都落到單位數嘅嚴重超賣水平，只係數值上仍然未見有起色，唯有繼續觀察。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
