噚日打咗一個近60年來最遠嘅八號風球，大家都以為大家無啦啦多咗一日打風假之時，其實有唔少人都係WFH架。
今日恒指再開返市，一開先升159點，報24808點，可能係因為今日係深圳特區建立40周年慶祝大會掛，不過到搭正9點30分正式開市，恒指就即刻開高低位，好彩一早叫定聊天室室友隻過夜恒牛拿拿聲走。
不過有部份手持騰訊(00700)熊過夜嘅，博「三頂不破」，結果今日一嘢就破，哼...呢個「三頂」真係垃圾！但到依家10點1分，見騰訊走勢雖然仲升緊，但都高開低走，由五分鐘圖至日線圖都見SlowSTC(14,3)處於嚴重超買水平，係有mark過騰訊一到「三頂」位就出熊博掉頭，唔通今次真係要「富貴險中求」？！
要我捉個股我寧願返去玩恒指好過，分分鐘有啲人買騰訊個心態同買蘋果(APPL)一樣，係一種崇拜。
依家10點13分，恒指週一(10月12日)高位計都叫做升穿返五條主要平均線，今日高開後，至依家報24050點，跌144點，以現價計恒指再次回落返50天線(24603點)同100天線(24641點)以下水平；不過，換保歷加通道出嚟嘅話，保歷加通道頂為25019點，呢個位就正正係熊證過千張期指重貨區嘅開始。
繼續睇埋恒指牛熊證街貨圖，今日牛證有一層新增街貨，牛證最貼價層上到去24100至24199點，呢度有相當於297張期指；至於熊證最貼價層(今朝一開市死咗24700至24799點，有相當於174張期指)為24800至24899點，呢度有成923張期指(唔好問我點解咁多街貨都唔向上繼續殺)，而牛熊中間位為24499.5點，按依家恒指跌幅收窄至不足100點計，恒指現價爬返上去近熊證嗰邊，吼5分鐘圖入恒指牛(57284)，收回價23900點，同現價有600點差距，逾42倍槓桿適合做DT，偷位一流。
今日係我一位舊老細生日，佢一早同太太移居台灣享受退休生活，威哥，生日快樂！下次返嚟香港，記得換智能身份證啦！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
