早排我同我家老爺嘅舊同事天爺再做爸爸，仲派薑醋派到比我哋兩老，為表謝意，我家老爺動用我手織咗張被仔比天爺嘅二公子，恭喜天爺弄璋之喜(追個女)。
依家10點6分，一早返到公司開晒所有機，上個星期五(9月18日)以平均買入價$0.0475而過咗個weekend嘅恒指熊(50004)，唔貪心嘅話喺今朝恒指高開低走至9點50分至10點，趁恒指5分鐘圖SlowSTC(14,3)兩線落到個位數嘅嚴重超賣水平時賣走，按嗰段時間(50004)高低位做過$0.062/$0.052，平均賣出價為$0.057，即平均賺幅為20%。
但如果喺未正式開市前，見今朝恒指微升，再同步見恒指牛熊證街貨圖，雖然上個星期五嘅肥牛減磅咗唔少，但300磅減到200磅嚟講，醫生都係會仍然話你肥，手持過weekend嘅淡倉見今朝恒指開高後倒跌得嗰百零點執20%(以(50004)計)條氣唔順嘅話，當然係可以將手上嘅貨沽一半、留一半，鎖定一半利潤，再用餘下一半貨嚟博今日下半場可能會出現嘅低位。
依家10點38分，恒指依家落到去24296點，做緊158點，而今日暫時做過低位為24260點，以呢個位置計，其實恒指已經踩咗入牛證第一層街貨24200至24299點，呢度有相當於606張期指；會唔會即日殺24000至24099點就唔知，不過都買你24200至24299點凍過水，逐層逐層殺開心啲。
去到依家都無貨嘅，坦白講喺牛證仍然咁重貨嘅情況之下，吼高開淡兼用隻高少少槓桿嘅證，如恒指熊(50116)，收回價24700點，同現價有約370點距離，槓桿比率約42.67倍，以高槓桿拉高賺幅比較有勝算，始終依家見恒指就算向下，都未肯一嘢劈落去(或者唔會啦)，慢落都考人耐性。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
