今朝一開恒指牛熊證街貨圖，都不禁嘩咗一聲，不過其實噚日輪商老友Gary都溫馨提示咁我話有24000點打後有好多重貨喺度，只係我估唔到最近嗰八層牛證街貨每層都有過千張期指喺度，坦白講真係印象中小妹第一次見到咁嘅盛況；老老實實，見到咁嘅樣都真係一心開熊啪。
今朝恒指開市升41點，報24381點，本以為恒指上行多幾步之後就會向下開餐，但到依家10點38分，恒指都係幾十點之間上上落落，價位處於244xx點水平；咁重咁多貨都唔下殺，真心覺得有啲奇怪，但還好噚日隻恒指熊(66118)見好即收，「又話預期個市會下殺肥牛？走咗隻熊點解會『還好』先？」免卻無啦啦捱過夜嘅風險啫。
睇返恒指日線圖，恒指目前處於五條平均線以下水平，開條保歷加通道出嚟嘅話，依家又未到保歷加通道底(24065點)喎，而SlowSTC(14,3)兩線都處於超賣位置，且%K線向下穿咗%D線，目前走勢圖上暫呈「十字星」，如果連同噚日支陰燭嘅話，就會變成「十字胎」，兩款都係代表轉勢，有幾靈就真係要睇個大戶係唔係放過八層過千張期指嘅牛證，轉勢向上殺...嗯...第四層(25000至25099點)先有一層嘅1022張期指熊證啦。
話時話，日線圖保歷加底部個位置，咪就係牛證重貨區24000至24099點嗰度囉，呢度有成1671張期指喎。
好想出5X倍嘅高槓桿熊，例如恒指熊(50336)，收回價24641點，但距離現價250點都無有啲壓力(今日星期五嘛，Happy Friday都輕鬆啲架)，或者恒指熊(50004)可以輕鬆少少，因為收回價喺24800點，逾40倍槓桿夠做day trade，低街貨都幾好呀。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
