依家10點24分,都返咗嚟公司接近大半個鐘,但剛剛先至坐喺張凳度,行嚟行去整完呢樣整嗰樣,但就好似咩都無做過,不過又感覺自已一朝早就咁忙咁,或者返工就真係咁。
睇返恒指今朝中高開,開市報24823點,升91點,到正式開市之後恒指就下行,至依家升37點,做緊24770點,頭先都有曾經倒跌過架,但跌幅唔算深,喺5分鐘圖見保歷加通道底都未到又再彈過,以目前呢個情況嚟睇,似乎有啲拉鋸出現,可能同出現「死亡交叉」VS重近熊街貨出現矛盾有關。
至於噚日隻恒指牛(57000),本身諗住見日線圖SlowSTC(14,3)上行中所以就揀隻牛證博會上25000至25099點嘅重貨熊,但噚日恒指又係以龜速嘅方式前進,於是打算改變策略轉為day trade,不過,以恒指5分鐘圖見,喺噚日下晝大約2點35分至2點45分,SlowSTC(14,3)上到70幾之後就再落,無緣見超買,但好彩之後(57000)嘅證價都處於平均買入價$0.0595之上,既然當初係以日線圖為依歸嘅話,就由得佢過夜啦,反正揀嘅時候都係預咗過夜。
直至今朝見恒指高開,見(57000)證價都隨大市上行,以開市首15分鐘計,(57000)高低位做過$0.071/$0.065,平均價為$0.068,對比噚日平均買入價$0.0595,過一過夜有14.3%執到,都算係一個唔錯嘅成績呀。
當見到恒指今日波幅咁窄嘅時候,就會又心思思去八掛下個恒指波幅指數(VHSI),見到日線圖嘅VHSI,SlowSTC(14,3)兩線都落到嚴重超賣水平,恒指悶熱咗咁多日,似乎暴風雨要嚟啦。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/秒投聊天室:輪證贏家