不得不承認年紀大，早兩日喺屋企發生好小型嘅家居意外，搞到自已chok親個膊頭同條頸，喺屋企貼咗啲藥貼，到今朝都仲有少少痛，哈哈，我以前成日笑老媽要左貼右貼，估唔到我都有今日啦。
恒指今朝開市同我條頸一樣，都係Chok咗一chok，開市報24569點，升66點；到正式開市後恒指chok到上24667點高位，都真係踩咗入熊證街貨範圍，但到依家10點7分，恒指走勢暫呈高開低收，做緊24619點，升115點。
開咗市半個鐘有多但恒指似乎未有異樣，都係睇咗個街貨圖先。今日所見牛熊兩邊都無新增街貨層，熊證最貼價為24600至24699點，呢度有相當於282張期指，如果將呢層拆開一半，以50點為一層嘅話，其實24600至24649點嘅熊證街貨已經死晒，呢度有相當於54張期指。
至於牛證方面，最貼價層為24200至24299點，呢度有相當於240張期指，以依家(10點13分)恒指做緊24651點計，點都係近熊證街貨嗰邊。
再者，即使24000至24099點嗰層過千張期指部咗成個星期都仲喺度，但喺25000至25099點呢度都已經俏俏地儲咗1054張期指，以目前恒指點數計向上行係吸引好多。
依家10點29分，恒指開市悶咗接近一個鐘頭之後忽然爆上，將24600至24699點全層熊證全數殺晒，最高見過24750點，即係話由24600至24749點嘅熊證全部都死晒，呢度夾埋有相當於588張期指。再過多10分鐘之後，恒指似乎再冷靜返，睇返5分鐘圖，見到SlowSTC(14,3)原來已經上到超買再超買水平，怪不得點都要抖一抖。
今日恒指喺朝早搶得咁高，印象中記得日線圖SlowSTC(14,3)都處超賣位置要彈起，於是轉去睇返恒指日線圖，就見到SlowSTC(14,3)果然喺低位%K線抬出頭來，不過上方似乎有條100天線(24666點)頂住，再嚟嘅仲有條10天線(24716點)作勢下行，想穿100天線發出「死亡交叉」訊號，至於25000點嘅過千張期指熊證街貨位置就大約等於20天線(25001點)水平，以日線圖計，SlowSTC(14,3)呢個位的確係開牛證嘅好時機，但頭頂呢個疑似「死亡交叉」令人有啲擔心，安全啲等恒指有計穿得過呢兩條線先再算啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
