鐘擺效應唔難估，美股之前三日急跌，納指仲要急回超過一成，隔晚嚟個反彈都合理，道指回升逾400點，標指跟納指反彈升逾2%。至於港股呢邊，相對美股唔算跌得多，自然反彈力水亦有限。缸邊友入市態度審慎，睇番半日成交額縮水至唔夠600億，可見要沽貨套利嘅已沽得七七八八，但有心買貨嘅又未肯出手，買賣兩閒成交自然縮水。
恒指高開116點，升幅一度擴大至146點，見24615點半日高位，估唔到反彈咁快行人止步，大市升勢不保，一度倒跌54點，低見24414點，其後大市止跌。半日恒指報收24478點，微升9點不提也罷；國企指數報9739點，升11點；恒生科技指數半日收報7109點，升93點。
藍籌重磅股個別發展，唔係阿Man睇死大笨象(00005)，半日股價跌0.8%，恒生(00011)陪跌半日唔見0.7%。之前阿Man睇好嘅內需股蒙牛(02319)會創新高，果然上月底升穿40元，近日隨大市回調，嚟到20日及50日線附近有支持，又到咗可以收集嘅水平。雖然隔晚紐約期油反彈，但三桶油今日未見起色，唔係阿Man馬後炮，一早話咗石油股唔使睇，年內油價有波幅，冇升幅，睇嚟都係浪費時間。
隔晚美股納指勁彈，唔少科技巨企亦彈番唔少，但香港呢邊嘅科技股，彈力只係不過不失，除咗近日特別弱嘅美團(03690)彈咗3.7%，其餘恒科指成份股，反彈升幅少於3%，小米(01810)半日彈2.5%，係表現最好藍籌，但連23元亦未能企穩，有心買貨真係唔使急。
雖然美股近日顯著調整，但阿Man相信係獲利回吐，多於散水玩完，皆因市場避險情緒未見明顯上升，即使金價反彈，亦受制於1950美元。所以上半場見金礦股及黃金ETF做好，亦未宜衝動追貨。
至於早兩日睇落有番啲起色嘅內銀股跟航空股，話咗高追必有伏，果然今日科技股稍為反彈，呢兩個板塊就雙雙回軟，始終實體經濟仲有排抂世界，預期呢兩個板塊今明兩年業績唔慌好得去邊。
農夫山泉(09633)上市無耐即獲納入恒生綜合指數，亦即係順利取得港股通入場券，農夫山泉將於本月22日正式成為恒綜指成份股，有機會同日被納入港股通，吸引資金追捧，半日升一成。不過農夫山泉掛牌前一日暗盤高見40元之上，但上市當日高開低走，估計36元樓上積咗唔少蟹貨，想趁熱鬧炒番轉，要轉身夠快兼識得走位。
麥狄文
(徐狄怡‧證監會持牌人)
