嘿，噚日見恒指超賣再超賣之後，連表現出想升嘅力度都無乜，於是將恒指牛(63540)同騰訊Call(12492)喺未入肉嘅情況下率先離場，結果恆指喺2點打後再向上衝過，當時SlowSTC(14,3)喺7X水平就折返向上，去到約2點50分幾乎收復噚日朝早失地，不過跟手又回過，收低於25500點以下水平。
今朝早眼都未擘大，我家老爺嘅晨早pillowtalk係：林卓廷同許智峯被人拉咗；「吓？衰咩呀？」於是起身開電視就見到條Ticker出現...
今朝9點未到時開恒指牛熊證街貨圖睇，奇怪點解都仲未update；忙咗一輪公司嘢之後，原來市都開埋，開報25520點；而牛熊證街貨圖終於都update到，見近牛街貨儲落唔少喺度(對比噚日得幾十張真係多咗好多)，但對比上方熊證街貨嚟講，當然係熊證街貨吸引啦。
雖然如此，但截至依家10點24分止，恒指最高做過25603點，明明踩入咗熊證第一層都要掉頭向下走，開恒指5分鐘圖望望，先知道原來條SlowSTC(14,3)已經上到頂，喺聊天室叫完人哋Day trade入熊之後，我諗佢哋都執咗今朝份早餐食。
睇返恒指日線圖，SlowSTC(14,3)由上週五(8月21日)喺6X呢個位反彈至今，%K線已經上到90以上水平，本週五(28日)為期結，預期例牌做好之下，恒指上25800點似乎都未必係難事，只不過按日線圖上SlowSTC(14,3)目前嘅水平，恒指牛(67439)，收回價24800點，同現價有約逾700點差距，換股比率10000，槓桿比率逾40倍，且戰且走，睇住日線條SlowSTC(14,3)。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
