上個星期五(8月14日)隻[下半part]將三隻染藍歡呼聲最高嘅小米(01810)、美團(03690)同阿里(09988)嘅走勢重新睇一次,完全無理會過呢三隻嘅業績如何、市值如何、未來發展如何等等,真係純粹用技術分析去睇一次(反正恒指服務公司如何揀股份入成份股都係得佢哋知架啦),結果就揀左隻小米牛(57170)出嚟,按照一貫策略,喺小米5分鐘上個星期五臨收市前20分鐘,SlowSTC(14,3)見回落至超賣水平,按(57170)當時高低位做過$0.24/$0.235,平均買入價為$0.2375。喺呢個位置入就好明顯一定要過weekend;而如果係炒染藍嘅話,唔過weekend又點炒?
上個星期五收市後恒指服務公布檢討結果,美團大熱倒灶,小米、阿里成功染藍;今早見小米裂口高開,至依家9點57分,小米最高見過$16.38,而5分鐘圖上,SlowSTC(14,3)亦已經回今朝嘅超賣位置彈升至超買水平,由9點55分至依家10點正計,(57170)高低位做過$$0.37/$0.3,平均沽貨價為$0.335,過weekend即袋41.1%。至依家即使小米再上,都只係開住個5分鐘圖望住佢高飛,SlowSTC(14,3)都上到9X以上,Day trade點追?吃過了就祝她一路幸福吧!
依家10點7分,恒指由今朝早升幾十點到依家升逾250點,做緊25434點,仲有66點就可以上到熊證第一層街貨25500至25599點嘅門口位置,而呢層有相當於734張期指,近熊嚟講算係第二重貨區,以恒指現水平咁接近嚟計,又點會唔殺?至於重貨區就喺25800至25899點,呢度有相當於1039張期指。
至於牛證方面,最貼價嘅為24900至24999點,呢度係新增街貨層,有相當於68張期指,同頭先mark嘅現價計有435點差距,又遠又少,或者都係等恒指5分鐘SlowSTC(14,3)回返落去超賣時,小注入恒指牛(63044),收回價24748點,同現價有逾500點差 ,期長、低街貨亦係賣點。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB:輪證贏家