依家9點57分,恒指今朝開市報跌,不過到依家已經將今朝個下跌裂口補返,最高暫時做過25251點,5分鐘圖SlowSTC(14,3)兩線上到超買水平之後,依家見到掉頭下行,仍然盯住近熊證堆街貨嘅話,怕且都要比啲耐性。
望望牛熊證街貨圖先,今日牛熊兩邊都無新增街貨。熊證最貼價為25500至25599點,呢度有相當於567張期指;重貨區仍然喺25800至25899點,呢度已經儲到超過1083張期指。
至於牛證方面,最貼價層為24600至24699點,呢度都有成824張期指;而重貨區就喺24100至24199點,唔經唔覺都有成1081張期指喺度。
計計牛熊街貨中間價:(25500+24699)/2=25099.5點,以依家10點16分恒指做緊25250點,升19點,點數上的確係靠近熊證街貨層,只怕按目前恒指5分鐘圖上SlowSTC(14,3)上到7X至8X呢個水平,似乎有啲唔啱落場策略。
恒指牛(67031),收回價24593點,同現價有逾500點差距,相約收回價中槓桿最高,適合day trade;恒指熊(54251),收回價25976點,都係,相約收回價中槓桿最高, 啱day trade用。揀一對牛熊出嚟嘅目的純綷係見呢兩日恒指都係悶悶地窄幅上落,咁就不如喺呢個窄幅上落中,超買入熊放牛、超賣入牛放熊,做來回trade啦,不過呢個方法要有好充足嘅時間睇住個市,同埋嚴守策略先可以做得到。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB:輪證贏家