噚日揀咗隻恒指牛(61358)，目的就係望住熊證嗰堆重街貨，結果喺噚日下晝2點打後恒指就爆咗上去，最高見過25291點，爭少少就殺晒25200至25299全層(Well，同死晒都無乜分別)，守得到(61358)上去臨尾市時見嚟走貨嘅話就當然肥仔啦，但由噚日下晝2點打後至收市，恒指5分鐘圖上SlowSTC(14,3)都處於嚴重超買計，(61358)高低位做過$0.081/$0.051，差距好遠，但拉個平均數$0.066，再對比朝早最高做過嘅$0.054計，執十零格似乎唔係難事。
噚日騰訊(00700)派咗份優於預期嘅業績，今朝股價抽升，恒指都被進一步推高至25490點開市，依家9點59分，恒指已經將今朝個裂口完全補晒，幾乎要倒跌咁滯，但5分鐘圖見SlowSTC(14,3)都只係回到落中軸水平，唔通又要落返去25000點度慢慢磨？
唔理住，睇咗牛熊街貨圖先。以今朝開市計，恒指第一層熊證25300至25399點全數死亡，呢度有相當於725張期指，變相上移至25400至25499點為最貼價熊證，呢度有相當於419張期指，但按今朝恒指以高位開市計，其實呢層都死得八八九九，再推上一層就到25500至25599點，呢度有相當於502張期指，又近又算肥，相當不錯。
至於牛證方面，今日並無新增街貨層，仍以24600至24699點為最貼價層，呢度有相當於214張期指。
計計牛熊街貨中間位：(24699+25500)=25099.5點，依家10點7分恒指報25228點計，兩者都仲有128.5點嘅距離。
依家10點9分，恒指似乎補完今朝個裂口之後又想爬返上去，但5分鐘圖見SlowSTC(14,3)都只係回到落中軸水平，怕且入恒指牛(69560)，收回價24500點，槓桿逾37倍，為相約收回價中槓桿最高，換股比率10000，仍然以day trade方式玩，小注為上。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
