萬眾期待嘅騰訊(00700)業績今日收市後將會公布，年年騰訊業績，股價都係「未公布，先興奮」，但今年似乎有少少例外。先是上個星期五(8月7日)一度失守$500之後，跟住嗰三日都係喺50天線之上守侯，日線SlowSTC(14,3)已經回到落超賣水平，但10天線($532.6)已經跌穿20天線($533.78)，多月來五條平均線順序排列嘅中長期利好訊號，就係被今日所見嘅「短期死亡交叉」被破壞。
依家9點50分，恒指今朝先跌22點開市，到依家跌幅已經擴大至跌158點，做緊24734點，5分鐘圖上SlowSTC(14,3)由今朝開市時嘅7X至8X水平向下行至2X至4X呢個位。
再睇埋恒指牛熊證街貨圖，今日五層新增牛證街貨層，最貼價層上至24600至24699點，不過呢五層新層街貨嘅街貨量唔算多，最多嗰層其實都只係得51張期指。而稍為有啲睇頭嘅仍然係24100至24199點，有相當於598張期指；再落多100點嘅話，即24000至24099點仲有成754張期指添。
至於熊證方面，噚日無厘頭上過25000點樓上，今日最貼價層上移至25000至25099點，呢度有相當於248張期指；而重貨區25200至25299，呢度有相當於1093張期指。點秤都似乎係熊證街貨吸引啲。
再計計牛熊中間位(25000+24699)/2=24,849.5點，同依家10點7分恒指報24815點差唔多，即是話恒指又企返喺牛熊街貨中間位，純綷以街貨計就更係上行有著數，但25000點呢個位又會用咩藉口去破？
再望多次恒指日線圖，恒指現水平頭頂嗰條20天線(24865點)同50天線(24905點)，又一個「死亡交叉」；但同時下方有一條10天線(24726點)托住，咁夾法今日怕且都係悶住等收市。
如果還原基本步睇住街貨做trade的話，恒指牛(61358)，收回價24293點，同現價有逾500點，差距適中，且於相約收回水平牛證中槓桿最高，吼5分鐘圖SlowSTC(14,3)落到超賣時入場，且戰且走，不宜久留。
BTW，有讀者email問我：又話爆廠但又有時間做Chatroom Promotion嘅？Oh! Well...你真係覺得係我做嘅？
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
