依家9點37分，恒指已經開咗市，開市報24664點，升206點；至依家升幅仍然keep住，至什199點，做緊24657點。日線圖上見恒指100天線似乎有啲力度作支持，不過今日一彈，暫時見似係彈咗上去「下降通道」頂部，且仲有條10天線(24771點)同50天線(24717點)頂住。假使條10天線chok得返上去嘅話。咁就唔需要擔心佢會同下方條生個50天線「死亡交叉」出嚟。
先望恒指牛熊證街貨圖，熊證方面見今日有新增街貨層，最貼價落到去24700至24799點，呢度有相當於250張期指。
哼，真係有意思，咁貼價嘅熊證街貨但就偏偏喺技術分析阻力位嘅10天線附近，如果大市就喺今日之內食晒呢層熊證街貨嘅話，咁即係升穿10天線同50天線之餘，仲升穿埋條「下降通道」。而喺陰陽燭圖上，今日一彈出現「大陽燭」，配埋之前兩個交易日嘅陰陽燭嚟睇，「早晨之星」即告成立，又係一個利好後市嘅訊號，不枉SlowTSC(14,3)喺嚴重超賣區等你哋咁耐。
至於牛證方面，噚日大市食得咁開心，今日一彈已經遠離牛證街貨層，最貼價嘅已經回落至24200至24299點，即使呢度有相當於869張期指，但同現價有近500點差距嘅話，即使依家9點48分見恒指5分鐘圖上SlowSTC(14,3)由開市時嘅超買水平向下走，致令依家恒指走勢高開低走般，但講緊個差距係500點，即使要向下chok，都可能要分兩轉。
那倒不如等恒指5分鐘圖上SlowSTC(14,3)由依家超買位向下行至超賣位時，出隻恒指牛(57491)，收回價24048點，同現價有近600點差距，同一收回水平中槓桿最高，小注及Day trade為主。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
