熱門:

2020年7月31日 港股直擊 即巿股評

【輪證贏家】輸少當贏

噚日噚早出隻恒指牛(53400)都仲好地地,朝早一轉確實執番十格八格唔成問題;問題就係喺下半場,大約1點半至2點15分到,見SlowSTC(14,3)再次回落返去超賣位,且恒指喺250XX點似有跌定跡象,落多次隻(53400)亦唔反對,反正都係博恒指喺25000點同50天線有一定支持。

誰不知A股無啦啦冧咗落去,搞到恒指都陪跌,且呢個跌勢都確係唔簡單,由250XX點水平直插無水花咁向下殺到落去246XX點先識得停,超賣再超賣出現都算,咁插落去真係迫人呢頭入、嗰頭止蝕,仲要係同人鬥快將隻牛拋售,人踩人畫面可想而知。

即使無作出止蝕動作,但(53400)收回價係24418點,兩者由今朝揀落時差相600幾點,至得返200點鬆啲,時所收市,考驗嘅唔止係持貨能力,仲有心臟機能;唯一過夜嘅原因只係博條SlowSTC(14,3)喺收市時處於超賣位抬頭向上,呢一下向上有望於第二日開市後延續,輸少當贏。

噚晚見美股開市後無耐都跌300點,跟手再跌500點;今朝起身見跌幅收窄至跌200零點;至依家9點32分正式開市後,恒指由今朝開微升3X點,至依家升幅叫做擴大至91點,做緊24801點,(53400)證價亦都彈返上去$0.04,雖然比起噚日1點半至2點15分趁SlowSTC(14,3)再次回落返去超賣位同博25000點有支持時買入呢啲咁大路嘅位,都仲爭成廿格,但總好過喺噚日冧完第一浸,喺大約3點15分打後出現嘅第二波下行嗰時走,多返十零格。

依家9點43分,恒指5分鐘圖見SlowSTC(14,3)由噚日收市時超賣檯頭至依家繼續搶高至超買位,再快手望望(53400)證價上到$0.05,對比噚日大路入市位,真係已經將止蝕位降到最低,博過夜唔想再揸嘅話可以吼呢啲位轍退;回到家鄉仲想玩落去?重新望過啲街貨排位先啦。

開恒指牛熊證街貨圖睇返,牛熊兩邊今日都無新增街貨,熊證最貼價層為25200至25299點,呢度有相當於599張期指;而第二層即25300至25399點,哼,做咗最多新增層,有相當於1146張期指。

至於牛證方面,最貼價為24600至24699點,呢層噚日差啲死晒,好彩仲有16點頂住,呢層裡面就有相當於74張期指,企得喺呢個位嘅比起噚日揸住隻(53400)需要更大勇氣,呢啲壓力唔係人人受得到,請受小妹一拜。

依家9點51分,恒指一口氣衝返上去249XX點以上之後開始有啲滯,正常,因為SlowSTC(14,3)已經上到嚴重超買位啦嘛。噚日焗坐嘅今日算叫做鬆到一口細細嘅氣;想追殺25300至25399點嘅過千張期指街貨嘅,似乎要等SlowSTC(14,3)冷靜返落嚟先至入市都唔遲。

其實,如果真係要殺呢層過千張期指嘅街貨,咪即係要個市剷返上去20天線(25338點)...咁噚日做乜fake我啫?

作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。

FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads