今朝早無啦啦落過一陣雨，依家又放晴；呢啲先慘，個太陽曬住個地下，落咗地嘅雨水就咁蒸返上去，如果個人喺企條街度就同地下啲水一齊蒸，熱到爆。
依家9點29分，Product team幫手追緊今日新上市恒指科技指數粒數，開市報6918點，升55點；至於恒指開市就報24909點，升204點。
日線圖上見恒指今日開市呢口價守得返上50天線(24636點)以上，而10天線(25165點)喺頭頂嘅距離好近。SlowSTC(14,3)條%K線似有跌停嘅跡象。
再睇牛熊證街貨圖，見熊證有兩層新增街貨層，最貼價落到去25100至25199點，呢度有相當於126張期指，重貨區就要上到26000至26099點，呢度有相當於860張期指。
至於牛證方面，雖然無新增街貨層數，但喺最貼價嘅24500至24599點呢度已經儲咗成868張期指，變成重貨區；而第二層24400至24499點亦不甘示弱，都有444張期指，係最多新增街貨層。
計計牛熊中間位，即(25100+24955)/2=24849點，依家9點40分，恒指開市後暫時仍能保持升勢，做緊24922點，升216點，數字上就係近熊證街貨多啲嘅，不過近牛咁重貨，真係甘心咁就放棄？
依家9點51分，仲見到個市吽吽地，有啲唔耐煩於是向個股埋手，搵搵下搵到隻金沙中國(01928)，股價由7月14日開市，高位%33.55一直向下行至依家見到嘅$29.6，五條主要平均線無晒，上個星期五(7月24日)就連保歷加通道底都無埋，不過今日暫時見走返入條保歷加通道裡面，且有跌定之嫌。
假使金沙之後只係按住保歷加通道作「長方形」橫行，但基於SlowSTC(14,3)兩線已回落至「嚴重超賣」水平，就算係「長方形」，都會由「長方形」底彈上「長方形」頂呀，14RSI又見率先起步。
其實金沙都算係屬於二線underlying，輪證數量話多唔多，話少唔少，成交有但唔活躍，要揀都真係有啲取捨，最終搵到隻金沙Call(24654)，行使價$32.88，11%價外，今年9月尾到期，實際槓桿逾9倍，引伸適中，街貨偏低，成交一般(暫時啫)，有興趣嘅就吼5分鐘圖見超賣入場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
