今日返咗公司,主要目的都係等速遞送件,叔叔你快啲到啦,公司得我同Pantry CEO兩個人咋。
恒指今朝開市跌223點,開市報25040點,開市後恒指跌擴大,至跌逾300點,最低見過24925點,都唔知係10天線(25284點)穿20天線(25350點)發出「死亡交叉」嘅威力,還是噚晚美股跌逾300點嘅後續,Anyway,呢個點數雖然未將24900至24999點嘅牛證街貨全層殺晒,但都唔爭好多,而呢度都只係得94張期指,落多兩層,即24700至24799點先至有687張期指,係最多新增街貨層。
至於上方熊證,最貼價為25300至25399點,呢度有相當於157張期指,以現價計相差200幾點,唔算話好遠。
睇返恒指日線圖,猶記得初初喺恒指圖上畫咗個「旗形」出嚟,之後因為「旗面」 開始大過「旗杆」,且下行至接近「上升軌」,所以又變咗第二個形態。發展到今日,恒指就連條「上升軌」都失守埋,進一步發展的,變成一條「小型下降通道」。
假設大市再轉變成以呢條「小型下降通道」運行,目前恒指位置就處於「小型下降通道」偏向頂部位置,如果大市目標係向住24700至24799點出發嘅話,其實都只係落返去「小型下降通道」嘅中軸水平。恒指熊(63149),收回價25600點,同現價有逾500點差距,屬安全距離,吼恒指5分鐘圖見超買時落場啦。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB:輪證贏家