噚日尾市真精彩，3點20分到恒指以直插無水花高難度動作方式忽然爆落，臨收市前大約10分鐘再出多條新問話「有報道指美國要求中國關閉休斯敦總領事館」，就連離岸同在岸人民幣失「七算」關，憂慮中美關係惡化一觸即發，5分鐘圖見SlowSTC(14,3)落到嚴重超賣水平。最終恒指噚日跌逾500點收市，牛證首三層街貨全數打靶。
依家9點22分，恒指開25235點，升177點，5分鐘圖見SlowSTC(14,3)由嚴重超賣水平回升。之前都有提及過，技術指標不如指數/個股有裂口，落到嚴重超買水平一係就出現鐘擺，抽升返上去；再唔係就輸「超賣再超賣」。按今次呢單嘢係突發消息，用消息嚟推冧個市，而市場向來對呢類型消息均以高速消化，開市彈返上去，衰啲講：估到你啦！
未正式開市，睇咗牛熊證街貨圖先。因噚日忽然下挫打咗三層牛證街貨，依家最貼價層為25000至25099點，呢度有相當於395張期指，當中有217張係噚日新增(怕且都係見爆落時，博今日反彈所以拿拿聲入貨)，跟手嗰兩層都都係得十零廿張期指，數到去24700至24799點呢度先至有416張期指，叫做多啲嘢睇。
至於熊證最貼價層喺25700至25799點，呢度就只得40張期指，上多層25800至25899點先至有451張期指，呢層亦都係最多新增街貨層，只可惜同開市價比嘅話，爭成400幾點，似乎遠咗少少。
9點35分，恒指正式開市，升幅略為擴大至升216點，做緊25274點，日線圖上恒指仍然處於20天線/保歷加通道中軸(25337點)之下，要爬返上去都唔難，只要條「上升軌」仲頂得住就可以啦；同步留意到日線圖上SlowSTC(14,3)開始見收油，問題只係在於喺5分鐘圖上SlowSTC(14,3)已經回彈返上去中軸位置，恒指牛(54092)，收回價24718點，與現價有逾500點差距，同一收回價中槓桿最高，或者都要等5分鐘圖SlowSTC(14,3)冷靜番先可以落到場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
