今日京東(09618)掛牌,可惜就遇著恒指跌市。喺巴士上見恒指開報24386點,跌95點;到差唔多落車時就見恒指跌幅擴大,依家9點51分,返到公司開晒所有電腦、電視之後,再開埋恒指5分鐘圖,就見今朝恒指開波第一支陰燭有幾大支,就係呢一下下行,令恒指跌幅一度擴大至逾300點。依家叫做收窄番少少,皆因SlowSTC(14,3)喺大約9點45分時已被大市搶低至嚴重超賣水平。
日線圖上今日恒指仍然處於10天線(24525點)同20天線(24017點)/50天線(24088點)之 ,技術上仍然處於保歷加上升通道裡面,不過就靠近咗保歷加通道中軸,而SlowSTC(14,3)則兩線於中軸範圍出現重疊,14RSI勢頭亦向下。
開埋恒指牛熊證,熊證最貼價層仍為24500至24599點,呢度有相當於239張期指。由呢度再始向上數到25000至25099點,呢六層內嘅街貨數量都尚數平均,由1XX至4XX都有。
至於牛證方面,今日見新增一層為24100至24199點,呢度有相當於170張期指,同噚日一樣,牛證中間有幾層街貨係零,直至到23600至23699點,即早排睇咗好耐嘅貼價層,先至叫做有相當於724張期指。
計計牛熊街貨圖中間位置,即(24500+24199)/2=24349.5點,按依家10點2分,恒指做緊24268點計,點數上就同牛證係近啲,但事實上又係熊證多街貨喎。
假設日線圖上20天線/保歷加通道中軸有力支持嘅話,可以預計到日線形態上會因呢個支持而再彈返上去,當然先再過埋10天線呢一關,先至可以進一步樂觀上望保歷加通道頂部(25391點)啦。
但喺未知大市想點走之前(其實都無方向咗兩三日),以Day trade玩法去做似乎係最穩陣嘅方式,用5分鐘圖嘅SlowSTC(14,3)吼住超買/超賣位落牛熊,而按目前熊證街貨吸引更多,可以上行為主導方向,即主要吼SlowSTC(14,3)落到超賣時先出手,再以貼價得嚟又留返少少buffer位比自己嘅牛證,如恒指牛(60071),收回價23660點,同現價有逾500點差距,以恒指近期表現,一個下晝開市跌500點都係閒事嚟講,呢個位都算安全,萬一有咩事碌穿24000點,都仲有300幾點比你走盞,近50倍槓桿比率雖然唔係最高,但Day trade嚟講已經夠用,(60071)亦係市場上同現價有500零點差距嘅牛證中槓桿最高。
如果你真係非常進取嘅,咁就推高啲,諗諗隻恒指牛(51630),收回價23928點,同樣都係24000點以下,但buffer位就只得72點,一個唔覺意啪死咗就真係無仇報,換股比率10000,由於係市場上第四貼價產品,所以槓桿比率有成78倍,呢隻嘢都應該會chok得好勁,諗過度過先好呀,否則都係用返(60071),好地地做乜要將自己放喺一個咁危險嘅位置呢。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家