噚日個市真係好嘢!明明見住高開低收幾近倒跌收市,哎呀,喺U盤時拗腰比佢彈番6點收工;不過都無用呀,噚日朝揀咗隻恒指牛(59604)最終都係要持貨過夜。
其實噚日要買隻(59604)一啲都唔難,事關喺噚日早朝大約11點40分至1點45分,恒指5分鐘圖SlowSTC(14,3)落到嚴重超賣範圍,呢個時侯可以將(59604)落場,按當時高低位$0.095/$0.079,平均買入價為$0.087。
不過,到下半場時恒指雖然一度由跌轉升,而5分鐘圖SlowSTC(14,3)亦於嚴重超買水平反彈上行,但都只係彈到7X至8X水平,都唔緊要,計落(59604)證價比起平均買入價都只係多咗兩格咁大把。噚日見恒指牛熊證街貨圖,熊證25000至25099點咁鬼吸引(都估到今日重貨區有機會再上移),(59604)揸過夜又點話。
今朝太古系+國航(00753)齊齊停牌,戰友Jack估國航全購國泰(00293),係嘅話都真係M&A界一單大新聞。到依家9點54分,仲未知因咩事停牌,或者下午就會公布架啦。
睇返個市,恒指今朝早升130點開市,報24906點,又有機會挑戰25000點。開市時恒指5分鐘圖上SlowSTC(14,3)兩線呈上但只係處於中軸位置。到9點45分,即恒指挑機再過25000點樓上無耐,恒指5分鐘圖上SlowSTC(14,3)亦已升到嚴重超買水平,就算至依家9點57分都仲係keep住呢個位,講緊恒指升逾200點,接近300點添;而點數計就創今日高位(9點58分見25069點)。
就按9點45分至依家(59604)mark低嘅低位$0.102同現時證價$0.109計,平均賣出價為$0.1055,即過夜後平均賺幅為21.3%。
唔貪心嘅話的確可以喺呢個位先行收割;當然如果你已經諗到睇埋恒指牛熊證街貨圖先再作決定嘅話,又唔係100%話你貪心嘅,本性嚟嘅啫。
喺牛熊證街貨圖上先熊證最貼價層為25000至25099點,呢度有相當於803張期指,比噚日減少咗610張,咁更係啦,唔驚無啦啦會打靶死咩,但又唔係見錢走得好遠,事關喺 25100至25199點呢度就已經見到重貨區,呢度有相當於889張期指。至於牛證最貼價層已經上移至23700至23799點,呢度有相當於596張期指。呢個情況,恒指靠近熊證區且街貨仲係咁重,續揸(59604)還是再換隻更貼價嘅牛證,或者都已經唔係重點啦。
依家10點4分,望望電視機,見恒指升幅已經逾300點,25000至25099點已經可以幫佢哋打堂齋,25100至21599點上移至最貼價牛證街貨層,至於25200至25299點,呢度都有484張期指;或者目光望遠少少,即25500至25599點,呢度嘅746張期指係近熊街貨區中第二重貨位。
開牛熊證搜尋器,見今日(59604)槓桿得返逾24.29倍,雖然唔算係一個低槓桿嘅數值,但恒指牛(59784),收回價23995點,全場最貼價牛證中槓桿最高,有逾28倍,等恒指靜冷一陣之後先至再搵位入市啦;唔入都OK架,反正(59604)可以收割,二來你睇返恒指日線圖,已經上到接近100天線(25145點)同保歷加通道頂部(25193點),呢兩條線咁近,要破都要儲啲勇氣先得。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家