經歷咗接近半年嘅新冠肺炎疫情,苦無解藥嘅情況之下,噚晚美國藥廠疫苗研發帶嚟好消息,刺激美股升逾900點,帶動埋今早亞股造好,恒指開市升554點,報24489點。就連我隔離個designer返到公司早餐都未食就話:「嘩!升5XX點,收割先!」口痕問佢買咗咩,佢答話係中石油(00857),無幾耐佢就放低個電話,喺個紙袋拎個包出嚟食啦。
追咗幾日嘅小米(01810),今朝股價唔單止受到恒指造好刺激,仲有噚日恒指服務公司宣布W股可以染藍,雙重利好之下彈高至$12.4開市,至依家5點59分,股價雖一度下行,但至今已呈「V彈」彈返上咗,而5分鐘圖上SlowSTC(14,3)今朝喺超買範圍後下行,至依家喺大約6X水平,%K線掉頭升穿%D線。而喺日線圖上今日10天線($11.522)升穿100天線($11.444),屬近期第二個「黃金交叉」,至但係SlowSTC(14,3)就仍然喺超買範圍發出看淡訊號,14RSI繼續高見7X,到底想點呢...都係由得佢先。
睇返恒指日線圖,今朝裂口高開後,重返10天線(24137點)、20天線(24109點)同50天線(23931點)之上,而SlowSTC(14,3)亦忽然轉好;但似乎仍未擺脫「長方形」格局(直接用條保歷加通道睇仲清楚)。
再睇埋恒指牛熊證街貨圖,今日彈升逾500點,將熊證首五層街貨全數打靶,最貼價層已經上移至24500至24599點,呢度有相當於238張期指;至於下方牛證,最貼價層為23600至23699點,呢層有相當於148張期指。
當照恒指現價(10點39分報)24426點計,顯然恒指現水平靠近上方熊證街貨;與此同時,估計今日大市急彈,不排除有資金即時入市開淡倉博高位掉頭,如是者即近熊街貨有機會儲至重貨區。唯開5分鐘圖見恒指SlowSTC(14,3)開市至10點35分都係貼住喺超賣水平,到依家先見回落,追升嘅都唔好喺呢個時間入啦,恒指牛(68348),收回價23657點,同現價有近800點差距,33倍槓桿+換股比率10000,適合做day trade;緊記:今日恒指一彈都幾大成數係因為疫苗有好消息而挾上去。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家