噚日下晝天朗氣清時,同事話嚟緊個星期六(5月16日)會打風;可能個風is coming,噚晚9點幾10點零鐘開始行雷閃電兼落大雨。今朝停車返工時,都有一陣毛毛雨落過,希望下晝同收工時唔好落雨啦。
今朝恒指都落毛毛雨,開市跌244點,報24358點;到依家9點54分,恒指最低做過24136點,最多跌466點。喺日線圖上恒指10天線(24210點)、20天線(24160點)同50天線(24161點)三線滙聚,以頭先mark低嘅低位計就當然跌穿過呢三線滙聚啦;不過依家先至開咗市半個鐘,正所謂「邊個可以笑到最後?」到依家都仲未知。
呢兩日都有講過小米(01810)同美團(03690),前者噚日開隻Call出嚟但就偷位day trade收工;後者去到下半場揀隻美團熊(50976),事關除咗噚日美團逆市下行之外,日線圖上呈「穿頭破腳」,SlowSTC(14,3)超買已經亦始見下行跡象。
喺噚日下晝大約3點25分至3點45分,5分鐘圖上SlowSTC(14,3)就由朝早嘅超賣位回升至9X嘅嚴重超買水平,如果喺呢段時間買入(50976)嘅話,就預咗要過夜。按呢段時間(50976)高低位做過$0.096/$0.086計,平均買入價為$0.091。
惜美團噚日收市時因為跌幅收窄,所以「穿頭破腳」右邊支陰燭都凸番隻長腿出嚟,及至今日甫開市就報$111,逆市又升番1.2%,開市時SlowSTC(14,3)處於8X超買位,到正式開市後SlowSTC(14,3)同股價都係下行,惜SlowSTC(14,3)行到落大約5X至6X中軸水平時就調頭向上,到依家10點14分,美團一度再創今日新高,高見$111.4,而(50976)亦都要小心,因為收回價為$114.8,同現價有3.X%差距,亦係市場上最貼價嘅熊證,槓桿今日已見逾15倍。喺10點17分時再見美團5分鐘圖,SlowSTC(14,3)%K線正正由超買位跌穿%D線,姑勿論係逃生門又好,反手打到個和又好,甚至倒咬佢一口都好,都要留心。
補多槍,從美團5分鐘圖睇到,其實美團喺噚日下晝1點35分做出全日低位$107之後回升,5分鐘圖上呈「圓底」,暫時未見頸線,因為本身估計係頭先(10點1分)美團5分鐘圖高見$111,同今朝早開市時高位$111睇齊。如果唔穿,就即日「V型」反彈兼「圓底失敗」,但一跌睇住個5分鐘圖,見佢抖抖氣之後又再上過,整體計嘅「圓底」仍然運行中;又所以(50976)要更加小心。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家