噚日林鄭宣布向所有港人免費派發CU Mask,今朝晨早7點就開始接受登記;今朝8點零睇新聞時話已經有200萬人喺度排緊隊;到我坐緊車返緊公司時,同事話佢就係嗰200萬排隊人潮之一,當時9點15分到,就已經排到佢(咁都係開住個browser啫)。
啱啱我都有開過個登記website,睇下要填啲咩資料,再加埋戰友Jack send比我嘅溫馨提示,再再加埋我家老爺嘅「我放棄」,browser就轉咗開恒指日線圖了。
依家9點52分,恒指重返24000點以上,做緊24004點,升135點,最高暫時見過24076點,叫做升穿過10天線(24052點)同20天線(24066點)。拆開5分鐘圖就見到,當恒指升穿10同20天線時,同步SlowSTC(14,3)都升到80至90嘅嚴重超買水平,跟手回落;至依家10點8分,恒指仍然處於24000點附近游走,不過5分鐘圖見SlowSTC(14,3)由之前超買位回落至6X後,%K線回升返上%D線之上。
由於恒指重返24000點以上,喺牛熊證街貨圖上,熊證最貼價街貨層23900至23999點嗰72張期指街貨全數收回,最貼價變成24000至24099點,而呢度有相當於212張期指。至於牛證方面,最貼價嘅23600至23699點只有相當於5張期指嘅街貨喺度。正常嚟講恒指上到熊證街貨區,且街貨量又比牛證區嘅多,向上繼行殺熊證街貨嘅機會好高;不過,恒指依家呢個位有10同20天線頂住,且至今(10點15分)開咗市都大半個鐘,見恒指點數都係喺2398x至2400x點之間作窄幅上落,個款好似有貨都唔想食咁;咁當然都唔排除可能喺 下晝忽然向上咬一口嘅。
既然暫時見指數無咩進展,都係睇返早兩日睇中比亞迪(01211)同噚日睥到嘅阿里巴巴(09988)。
比亞迪今日股價隨市上揚,14RSI進一步升至64水平,不過SlowSTC(14,3)%K線同%D線於8X水平兼繼續發出向淡訊號。股價現水平仍然處於五條平均線之上,且貼價保歷加通道頂($49.096)上行,SlowSTC(14,3)。即使喺日線圖上SlowSTC(14,3)可以畫得到嗰「雙頂」出嚟,但係喺走勢圖上要畫都真係有啲勉強。比亞迪,都係繼續放埋喺一邊度先啦。
至於阿里方面,今日終於都抬起頭做人啦,至10點30分止,阿里做緊$190.8,升1.2%。日線圖上雖然仍然重上任何天線之上,而SlowSTC(14,3)%K線亦未升穿%D線,但%K線已作勢向上兜起%D線;不過,問題係阿里有無計彈升埋條「下降通道」呢?就算有,拆開5分鐘圖見阿里由今朝開市至依家10點34分,股價keep住喺$190以上,同步見SlowSTC(14,3)都keep住喺嚴重超買水平上橫行。
開咗市一個鐘鬆啲但走勢上都好似無咩大變化咁,或者可以諗定今日lunch去邊度買外賣算啦。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家